12 жніўня сваё прафесійнае свята адзначаюць будаўнікі. З гэтай нагоды намеснік старшыні райвыканкама Леанід Іванавіч Лясовіч адзначае:

— Нагрузкі нашым будаўнікам дастаткова, усе спецыялізаваныя арганізацыі заняты на аб’ектах. “Міёрскі рамонтнік”  абнаўляе жыллёвы фонд, будынкі РКБА, кінатэатра, райвыканкама. Работнікі ПМК-55 працуюць на саракакватэрным доме, новай малочнатаварнай ферме “Карпачова” ў ААТ “Пад’ельцы” і новай бальніцы ў райцэнтры.

Пакуль скарацілася ўзвядзенне дамоў у сельскай мясцовасці. Калі раней за год іх будавалі некалькі дзесяткаў, то сёлета адзін у ААТ “Пад’ельцы”, аднак на наступны год запланавана дзевяць. Вядзецца рэканструкцыя 19 ферм ва ўсіх гаспадарках.

Калі новая бальніца адчыніць дзверы для пацыентаў?

— Яе кошт па каштарыснай дакументацыі складае 110 мільярдаў рублёў. На гэты год выдзелена толькі 10 і яны асвойваюцца. Увядзенне бальніцы ў эксплуатацыю і яе адкрыццё плануецца ў наступным годзе пры ўмове паступлення грашовых сродкаў.

Будаўніцтва шматпавярховых дамоў будзе працягвацца?

— Заканчваюцца работы на саракакватэрным доме, што па вуліцы Ягора Томкі, у наступным годзе ставім задачу ўзвесці яшчэ адзін. Працуюць будаўнікі і ў Дзісне.

А наконт заробку будаўнікоў…

— У сярэднім ён 3 мільёны рублёў. Да канца года будзе павышацца.

Вашы пажаданні з нагоды свята.

— Усім будаўнікам і іх сем’ям зычу моцнага здароўя, поспехаў, дабрабыту, плёну ў працы!

Вольга ВІШНЕЎСКАЯ.