Авторизация
 

Вось і вёска Сухавержжа, а побач раскінулася Ельня

 У вёсцы Сухавержжа ў навагоднюю ноч не чуваць гоману моладзі і выбухаў петард, не ўзлятаюць у неба пасля бою курантаў салюты. Тут два жылыя дамы. Іх гаспадары прывыклі да навакольнага спакою. Новы год сустракаюць ціха па-дамашняму.

ПЕРАД мастом у Старых Круках зварочваем з трасы направа. Едзем прама па вузкай дарозе праз невялікія вёсачкі без указальнікаў. На скрыжаванні ў Маляўках навігатар падказвае павярнуць налева. А вось і Сухавержжа. Выстраіліся ў радок вясковыя хаты. Здаецца, далей толькі балотны прастор.


 — За намі яшчэ дзве вёскі. У Мнюхах два жылыя дамы, Дунісёва зусім апусцела, — расказвае старэйшына Сухавержжа і ваколічных вёсак Жанна Пятроўская, якая чакае нас на дарозе ў кампаніі з верным сябрам Рэксам.


Сабака суправаджае гаспадыню і на працу, і на рыбалку, і па журавіны. Да Ельні рукой падаць. Недалёка адно з самых маляўнічых месцаў заказніка — возера Курганістае. Не паспееш стаміцца, як дойдзеш да Бліжняга і Белага.


Цёплай парой у вёсцы турысты. Пытаюцца ў сяльчан пра шлях на балота. Зімой ціха. Прыходзіць паштальён ды аўтамагазін два разы на тыдзень прыязджае. Часцей наведваюцца госці з лесу — зайцы, лісы, ваўкі, казулі.


— Мы прыехалі ў Сухавержжа з Латвіі ў 1993 годзе. Адсюль родам муж. На той час тут васямнаццаць жылых дамоў было. Цяпер толькі два ды яшчэ дзве дачы, — гаворыць Жанна Паўлаўна. — Дзесяць год я паштальёнам адпрацавала, пасля стала сацработнікам. Зараз абслугоўваю шэсць чалавек у ваколічных вёсках. Добрым надвор’ем на веласіпедзе еду. На ім і ў Міёры дабіраюся, калі трэба.


У ціхай вёсцы сумаваць Пятроўскім няма калі. На падворку дзве каровы, конь, свінні і куры. Усіх трэба накарміць і дагледзець. Летам дадаецца спраў на агаро- дзе. Увосень трэба пабегаць па журавіны, а зімой — парыбачыць.
— Летнюю рыбалку не люблю, а вось цяпер — асалода, — усміхаецца субяседніца. — Шчупак пакуль не вельмі бярэцца, нядаўна добра клявалі акуні.


Смажаная рыба — страва на стале і паўсядзённая, і святочная. Уключана ў навагодняе меню разам з “Аліўе” і “Селядцамі пад шубай”.
НОВЫ 2019 год Генадзь Уладзіміравіч і Жанна Паўлаўна сустрэнуць удваіх. На мінулы прыязджала з Чэрасаў малодшая дачка Вераніка з мужам, сёлета застануцца дома з маленькім сынам. Са сваімі сем’ямі будуць адзначаць свята старэйшыя Алена ў Міёрах і Кацярына ў Полацку. Апоўначы патэлефануюць бацькам на мабільны з віншаваннямі.


— У першыя хвіліны Новага года набіраем нумары родных і сяброў. Абавязкова маме тэлефаную, яна ў Латвіі засталася, — гаворыць Жанна Паўлаўна. — Глядзім па тэлевізары навагоднія фільмы і перадачы. “Залы” няма, сказалі, сігнал тут браць не будзе. На прыстаўцы некалькі беларускіх каналаў.


Абавязковы атрыбут навагодняй пары — жывую елку — Пятроўскія ставяць да 25 снежня. І па традыцыі кладуць пад ёй цукеркі.
— Так рабілі, калі дзеці малыя былі. Казалі ім, што гэта авечка цукерак насыпала.


— А чаму авечка, а не Дзед Мароз?
— Таму што Ісус Хрыстос у яслях нарадзіўся.


 НЯСПЕШНА ідзём па заснежанай дарозе да дома Аляксандра Мікалаевіча і Ірыны Фадзееўны Сцяпанавых. Яго нельга не заўважыць. На падворку белыя лебедзі з аўтамабільных шын, фасад аздоблены сонейкамі з падручных матэрыялаў.


— Лебедзяў сыны зрабілі, — гаворыць гаспадыня. — Летам кветкі на клумбах красуюць. Іх мала хто бачыць, для сябе вырошчваю, падабаецца. Часам турысты просяць сфатаграфавацца на нашым падворку.


Адлегласць паміж суседзямі метраў пяцьдзясят. У госці адзін да аднаго хадзіць няма калі, штодня ў клопатах. Сцяпанавы таксама трымаюць дзвюх кароў, каня, птушку ды яшчэ авечак. Часцей бачацца іх чацвёраногія вартаўнікі. Толькі зайшлі на падворак, а Рэкс ужо частуецца косткай ля будкі такога ж чорнага Дружка.


 Як і Пятроўскія, Сцяпанавы вярнуліся ў ціхую вёску з Латвіі ў пачатку 90-х гадоў.
— Я тут вырасла, у школу са старэйшым братам у Крукі за сем кіламетраў хадзілі. Пасля скончыла чыгуначны тэхнікум у Даўгаўпілсе. Вучылася на аглядчыка вагонаў, — расказвае Ірына Фадзееўна. — З мужам у Латвіі пазнаёмілася, ён родам з Калінінграда. Калі прыехалі ў Сухавержжа, уладкаваўся ў лясную гаспадарку, а я работу так і не знайшла. У сезон журавін на балоце, іншым часам за хатнімі справамі.


Шумнай і шматлюднай памятае сяльчанка сваю вёску. Цяпер тут ледзь не першародная цішыня. І яна па душы мясцовым жыхарам.
 — Калі бываю ў Міёрах, нават галава пачынае балець ад залішняга шуму, — усміхаецца субяседніца.


НАВАГОДНЯЯ ноч у доме Сцяпанавых таксама спакойная. На ўмеранай гучнасці “гаворыць” тэлевізар, ззяюць гірлянды на жывой елцы. За сталом гаспадары ўдваіх. Дарослыя сыны сустракаюць свята са сваімі сем’ямі. Мікалай жыве ў Чапуках, працуе ў мясцовай гаспадарцы. Аляксандр у Пад’ельцах, заняты ў камунальнай службе.


— З дзецьмі штодня трымаем сувязь па мабільных. У цёплую пару часцей прыязджаюць. Дапамагаюць сена нарыхтаваць, пасадзіць і выкапаць бульбу, — гаворыць Ірына Фадзееўна. — Саша прывозіць прадукты, заказаныя праз “Е-дастаўку”. У нашым аўтамагазіне асартымент слабы, да святочнага стала не ўсё купіш.


КАЛІСЬЦІ даўно ў Сухавержжы ноч з 31 снежня на 1 студзеня не была святочнай. Старажылы лічылі Новым годам дату 14 студзеня. Цяпер свята прыходзіць у вёску па агульным графіку. Толькі больш размераным крокам, без шумнага фону і амбіцыйных задач на наступныя 365 дзён. Пажаданне ў вяскоўцаў простае — каб былі здаровыя самі і ўсё ладзілася ў дзяцей і ўнукаў. 

Фотаматэрыял Казіміра БЛАЖЭВІЧА.

Кацярына РЫНКЕВІЧ,
s.katrin.r@mail.ru

рейтинг: 
Пакінуць каментар
Мы ў сацыяльных сетках
  • Камэнтуюць
  • Актуальна
  • Чытанае

Рэцыдыў

  • 09 ноябрь 2010, 11:17
  • 94 936
  • 0

Інвестыцыйны форум

  • 23 сентябрь 2011, 10:05
  • 72 499
  • 1

Злавілі рыбку, ды… залатую

  • 28 февраль 2011, 16:16
  • 38 291
  • 0

Пераброддзе 2012. Погляд вучонага

  • 31 август 2012, 15:19
  • 36 951
  • 0

  • 11 февраль 2011, 11:20
  • 35 673
  • 0

Кандыдатамі жадаюць стаць

  • 21 август 2012, 15:30
  • 33 883
  • 0

Вагон "вярнуўся"

  • 11 июнь 2013, 10:04
  • 0
  • 2

Пра тых, хто акты рэгіструе

  • 19 декабрь 2012, 09:24
  • 0
  • 2

Трагічны люты

  • 01 март 2011, 09:00
  • 22 904
  • 2
Курс валют НБРБ
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 21 января 2019
Василий, Виктор, Владимир, Георгий, Григорий, Дмитрий, Евгений, Емельян, Иван, Илья, Михаил, Юлиан, Василиса, Доминика

Именины 20 января 2019
Василий, Иван, Афанасий

Госці краін
free counters
Партнеры сайта