З 16 мая ўступіў у сілу ўказ “Аб адміністрацыйных працэдурах, якія ажыццяўляюцца дзяржаўнымі органамі і іншымі арганізацыямі па заявах грамадзян”. Калі раней кожная адміністрацыйная працэдура абазначалася асобна, цяпер яны згрупаваны па раздзелах: выдача і абмен пашпарта, выдача віду на жыхарства, пасведчання бежанца і г.д.

Павялічылася колькасць адміністрацыйных працэдур, якія выконваюцца падраздзяленнем па грамадзянству і міграцыі. Замест 44 цяпер—52. Аб’яднаны ў адну абмен пашпарта ў выпадку заканчэння тэрміну яго дзеяння; перамены прозвішча, імя і імя па бацьку ці ўстанаўленне недакладнасцей у запісах; расходавання лістоў, прызначаных для віз; у сувязі са змяненнем палавой прыналежнасці; у сувязі з непрыдатнасцю для карыстання.

Упершыню ва ўказе агавораны адміністрацыйныя працэдуры, якія па просьбе грамадзян ажыццяўляюцца з паскарэннем. Указаны тэрміны разгляду хадатайніцтва, а таксама памер дзяржаўнай пошліны. Напрыклад, пашпарт у паскораным парадку афармляецца ў тэрмін да 15 дзён, за што дадаткова ўносіцца 0,5 базавай велічыні.

Зменены парадак і тэрміны разгляду некаторых адміністрацыйных працэдур. За афармленне дзецям да 16 гадоў пашпарта не спаганяецца пошліна за камп’ютэрную рэгістрацыю. Непаўналетняму, які выязджае за мяжу ў складзе арганізаванай групы для аздараўлення ці на лячэнне, пашпарт афармляецца на працягу 7 дзён.

Змяненні тычацца і парадку выдачы дакументаў аб запрашэнні ў Беларусь іншаземных грамадзян і асоб без грамадзянства. Тэрмін разгляду такіх заяў скарочаны з 30 да 10 дзён, у выпадку паскарэння пры аплаце 0,5 базавай велічыні—да 5 дзён.

Нагадаю, што для падачы заявы на выдачу (абмен пашпарта) грамадзянам, якія жывуць у прыватным сектары райцэнтра, неабходна звяртацца ў падраздзяленне па грамадзянству і міграцыі РАУС. Жыхары дамоў, якія абслугоўвае УП ЖКГ, звяртаюцца ў разлікова-касавы цэнтр унітарнага прадпрыемства, а сельскія жыхары раёна—у сельсавет па месцы жыхарства.