Председатель Витебской областной организации профсоюза работников АПК Татьяна Диканова посетила в столовую СУП «Черессы»
25-04-2025, 16:58 973
Карміць смачна, як дома. Такую задачу паставілі перад супрацоўніцамі сталовай СУП «Чэрасы» Юліяй Скавародка і Юліяй Супранёнак. З заданнем спраўляюцца. Гэта пацвярджаюць механізатары, якія харчуюцца ў полі гарачымі абедамі. Нядаўна іх прадэгуставалі госці з абласной арганізацыі прафсаюза работнікаў АПК.
Суп з капусты, бульбяное пюрэ са смажанымі каўбаскамі, салата з капусты, крабавых палачак і кукурузы, кампот. Вось адзін з прыкладаў меню для занятых у полі механізатараў.
– Складаем меню самі. Улічваем просьбы тых, для каго гатуем, – заўважае повар. – Нядаўна галубцамі кармілі. Яшчэ дранікі прасілі, і гэтай стравай парадуем.
На кухні сельгаспрадпрыемства повар Юлія Скавародка і яе памочнік Юлія Супранёнак з 9 красавіка. Для абедзвюх гэта першы кулінарны сезон.
– Сюды на працу выйшла пасля водпуску па доглядзе дзіцяці, – гаворыць Юлія Скавародка. – Па дыпломе я швачка, на справе розныя прафесіі асвоіла. Спачатку на чэраскім комплексна-прыёмным пункце КБА працавала, затым санітаркай у аддзяленні анестэзіялогіі і рэанімацыі раённай бальніцы, пасля прадаўцом у магазіне ў Чэрасах, затым восем гадоў на мясакамбінаце, куды часам пешшу даводзілася хадзіць. Цяпер ад дома да месца працы зусім блізка.
– У мяне прафесія повара-афіцыянта. Апошнім часам была занята ў Віцебску ў СушыДоме, – расказвае Юлія Супранёнак. – Цяпер жыву і працую на малой радзіме. У цэлым уражанні станоўчыя. Думала, будзе нашмат складаней.
Да клопатаў на кухні гаспадынькі прыступаюць у 7.30. Рыхтуюць посуд і неабходныя для страў прадукты. Калі ў меню пюрэ, трэба начысціць вядро бульбы, плюс яшчэ паўвядра для супа. Са слоў повара, з гэтым спраўляюцца за паўгадзіны. Спрашчаюць клопаты электрамясарубка і міксер. Пасля дзевяці раніцы работа на кухні кіпіць-бурліць у прамым сэнсе, а бліжэй да 11.00 гарачыя стравы і напой ужо разліты па бачках і гатовы да вандроўкі па палях гаспадаркі.
– Колькасць абедаў штодня розная. Сёння дзесяць, гэта няшмат. Аднойчы 27 гатавалі, – заўважае памочнік повара.
– У прынцыпе розніцы – гатаваць на дзесяць чалавек ці на дваццаць – няма. Толькі што колькасць прадуктаў розная. Галоўнае, каб смачна было, – падкрэслівае повар. – Нам сказана карміць смачна, як дома. Так і кормім. Каўбаскі смажаныя спадабаліся механізатарам, курыцу запечаную ацанілі. Ды і ў цэлым не скардзіліся.
Пакуль Юлія Супранёнак развозіць абеды, Юлія Скавародка наводзіць парадак на кухні, прадумвае меню на наступны дзень. Пасля трох гадзін усе справы завершаны, час збірацца дадому.
Напрыканцы красавіка на кухню да чэраскіх гаспадынек завітала старшыня Віцебскай абласной арганізацыі прафсаюза работнікаў АПК Таццяна Дзіканава. Па яе меркаванні, у перыяд сельскагаспадарчых палявых работ важна падтрымліваць як тых, хто працуе на зямлі, так і тых, хто іх корміць. Уручыла работнікам сталовай падарункі, пажадала поспехаў у працы.
Далей госці з вобласці скіраваліся ў поле пацікавіцца ў механізатараў, ці смачна гатуюць повары. За вёскай Новыя Крукі шчыравалі Павел Драгун з дыскатарам, Генадзь Баніфатаў на загрузчыку і Сяргей Міхайлаў з сеялкай. Ішла сяўба зернебабовых на полі ў 90 гектараў. Працаўнікі пацвердзілі, што абеды сытныя і смачныя, улічаны іх просьбы. Прадэгуставалі і ацанілі смак і пажыўнасць страў прадстаўнікі прафсаюзнай арганізацыі.
Галоўны тэхнічны інспектар працы абласной арганізацыі прафсаюза работнікаў АПК Яўген Зуй правёў з механізатарамі гутарку на тэму выканання правіл бяспекі падчас палявых работ.
Кацярына Рынкевіч.
Фотаматэрыял Казмімра Блажэвіча.
