Як толькі адступаюць маразы і сыходзіць снег, у дрэў пачынаецца перыяд руху соку. Адначасова паяўляюцца людзі, якім карціць паспытаць бярозавіку. На жаль, спажывецкі запал часта бярэ верх над розумам і пачуццём адказнасці, а ў выніку калечацца сотні дрэў, многіх з іх потым напаткаюць хваробы і хуткая гібель.
Нарыхтоўваць сок можна толькі на спецыяльна адведзеных участках ляснога фонду з захаваннем тэхналогіі. Можна набыць яго і ў структурных падраздзяленнях прадпрыемстваў лясной гаспадаркі.
Юрыдычныя асобы, якія вядуць лясную гаспадарку, вядуць нарыхтоўку бярозавіку ў насаджэннях, прызначаных для высечак галоўнага карыстання, але не раней чым за 5 гадоў да гэтага. Пры тым неабходна забяспечыць захаванасць тэхнічнай якасці драўніны.

Нарыхтоўка бярозавага соку можа таксама праводзіцца на ўчастках, якія адведзены для іншых высечак, высечак прамежкавага карыстання ў год правядзення гэтых работ. Але і ў такім выпадку выбіраюцца толькі дрэвы, якія будуць ссечаны.

Пры нарыхтоўцы соку юрыдычныя асобы і індывідуальныя прадпрымальнікі павінны мець лясны білет, выпісаны прадпрыемствам лясной гаспадаркі.

У астатніх месцах на землях ляснога фонду нарыхтоўка соку з дрэў забараняецца. Нельга займацца гэтым у наступных месцах:
- у прыбярэжных палосах рэк і азёр, у межах палос адводу чыгуначных і аўтамабільных дарог;
- у населеных пунктах;
- у месцах знаходжання дзікіх жывёл і раслін, якія ўключаны ў Чырвоную кнігу;
- на тэрыторыі санаторыяў, дамоў адпачынку і ўстаноў аховы здароўя;
- у месцах масавага адпачынку насельніцтва.

Пры нарыхтоўцы соку ў забароненых месцах ці без адпаведнага дакумента, з выкарыстаннем забароненых сродкаў і метадаў парушальнікаў чакае папярэджанне ці штраф у памеры да 20 базавых велічынь, на індывідуальных прадпрымальнікаў — да 100 базавых, а на юрыдычную асобу — да 500. Аналагічныя пакаранні прадугледжаны і для выпадкаў, калі дрэвы пашкоджаны ў такой ступені, што спыняецца іх рост. Гэта тычыцца лясоў першай групы і не ўваходзячых у лясны фонд.

Адначасова са штрафамі вінаватыя абавязаны пакрыць шкоду, прычыненую навакольнаму асяроддзю. Пры тым незаконна нарыхтаваны сок адбіраецца ці спаганяецца яго кошт.