Завітала з падарункам намеснік старшыні райвыканкама Таццяна Стальмачонак, якая адзначыла: "90 гадоў—значная дата, пройдзена нямала этапаў станаўлення. У раёне спрыяльнае санітарнае становішча, яму папярэднічае выдатная праца, перадача вопыту ад ветэранаў. Наш Цэнтр гігіены і эпідэміялогіі займае першыя месцы ў спаборніцтвах не за "прыгожыя вочкі", а за ўпартыя і дасканалыя штодзённыя старанні. Ля руля—кіраўнік з 40-гадовым стажам, і гэта, трэба засведчыць, асаблівы дар".

 

Таццяна Алегаўна перадала прывітальны адрас ад старшыні райвыканкама Ігара Кузняцова, дзе адзначана, што ў работнікаў Цэнтра самая гуманная прафесія—ахова людскога здароўя. 

Галоўны ўрач ЦРБ Алена Сівая ўпэўнена, што юбіляры таксама медыкі, бо на ўвазе адна мэта—умацоўваць здароўе насельніцтва. Таму медыцына і санітарная служба часта вырашаюць сумесныя пытанні. Выдатна, што ў раёне няма масавых захворванняў, атручванняў, не зачыняюцца па гэтай прычыне школы і садкі.

Начальнік аддзела адукацыі, спорту і турызму Аляксандр Жук засведчыў, што віноўнікі ўрачыстасці—частыя госці ва ўстановах адукацыі. Дзякуючы іх прафесіяналізму, у раёне здаровая абстаноўка, а пра чужыя эпідэміі даведваемся толькі са старонніх СМІ. 

Гаварылі прыемныя словы і адорвалі гаспадароў дырэктар мясакамбіната Віктар Бандарэнка, дырэктар дзіцячага санаторыя "Ра-сінка" Юрый Баранаў. Ушанавалі юбіляраў кіраўнікі хлебазавода, райспажыўтаварыства, жыллёва-камунальнай гаспадаркі. 

Тым часам галоўны санітарны ўрач раёна Рамуальд Маліноўскі расказаў пра станаўленне галіны. Пасля вызвалення раёна ад нямецка-фашысцкай акупацыі арганізавана санітарна-эпідэміялагічная станцыя, якая абслугоўвала 16 тысяч чалавек. Аснашчалася адной сухажаравай камерай і тэрмастатам на драўляным паліве. Месцілася ў трох кабінетах. Фінансавалася праз раённы аддзел аховы здароўя. З транспарту—конь. Служба пераважна наглядала за аб'ектамі харчавання і вяла прафілактыку па барацьбе з інфекцыямі. У 50-я гады ў раёне насельніцтва хварэла на сыпны і брушны тыф, дызентырыю, шкарлятыну, дыфтэрыю, каросту. Шырока распаўсюджаны быў педыкулёз. Санстанцыя хутка ліквідавала сур'ёзныя пагрозы. 

У 1963 годзе з'явіліся лабараторыі паразіталогіі, бактэрыялагічная і хімічная, прафдэзаддзел і аператыўны—размяшчаліся ўсе ў аднапавярховым драўляным будынку па вуліцы Кастрычніцкай. У 1974 годзе на Камуністычнай пачаў узводзіцца новы тыповы будынак, і ў 1977-ым адбылося яго засяленне. Менавіта ў гэты перыяд, з 1975 года, галоўным санітарным урачом раёна стаў Рамуальд Маліноўскі, які прыехаў у Міёры з Мядзельшчыны пасля Мінскага медінстытута. 

Да гэтага часу Рамуальд Уладзіміравіч кіруе ўстановай. У яе структуры аддзел гігіены, эпідэміялагічны, мікрабіялагічная, санітарна-гігіенічная, радыялагічная лабараторыі. Занальная санітарна-гігіенічная лабараторыя больш за 30 гадоў кантралюе не толькі мясцовыя аб'екты, але і ў Шаркаўшчынскім, Верхнядзвінскім, Браслаўскім раёнах.

 

За любой падзеяй, кожнай перамогай і ўдачай стаяць людзі. Рамуальд Маліноўскі адзначыў калег на заслужаным адпачынку. Урач-бактэрыёлаг Надзея Андрэеўна Сямыга адпрацавала ў санслужбе 31 год. Яшчэ большы стаж, 40-гадовы, мае Уладзімір Сцяпанавіч Матэленак. Пешшу, на веласіпедзе, лыжах ён дабіраўся ў самыя аддаленыя вёскі Міёрскага і Шаркаўшчынскага раёнаў. З 1964 да 2001-га працаваў у СЭС Мікалай Іосіфавіч Міхайлоўскі. Мікалай Паўлавіч Леановіч прысвяціў санслужбе 38 гадоў, Соф'я Вікенцьеўна Ядрэўская і Ядвіга Антонаўна Свяцкая—па 33, Валянціна Іванаўна Лавішак і Зінаіда Юльянаўна Буда—па 32, Рамуальда Альдэфонсаўна Маляўка—30.

На жаль, за апошнія пяць год Міёршчына страціла Нону Антонаўну Крук, Раісу Мікалаеўну Леановіч, Ванду Ігнатаўну Плоскую.

Цяпер у РЦГЭ 42 работнікі, у тым ліку 8 урачоў і 18 прадстаўнікоў малодшага і сярэдняга медперсаналу. Рамуальд Уладзіміравіч аб'явіў падзякі ветэранам працы, якія ў надзейным страі. У загадчыцы аддзела гігіены Тамары Скавародка стаж 34 гады, у памочніка ўрача-гігіеніста Вячаславы Мароз—42. Фельчар-лабарант Вера Даргель у санітарнай службе 36 гадоў, памочнік урача-эпідэміёлага Людміла Дулінская—34, а ўрач-бактэрыёлаг Валянціна Кудраўцава—21. У іх надзейныя маладыя пераемнікі—Алеся Арэхава, Юлія Любезных, Святлана Кузьміна. 

Падарункі дасталіся сваім героям. За шматгадовую добрасумленную працу Ганаровыя граматы райвыканкама ўручаны Тамары СКАВАРОДКА і Вячаславе МАРОЗ. Усім калегам галоўны санітарны ўрач прызначыў прэміі ў залежнасці ад стажу работы. Прафсаюзны лідар Алена Танкавід падрыхтавала сюрпрызы ветэранам галіны. 

Санітарныя ўмовы ва ўстановах і прад-прыемствах, школах і дзіцячых садках, аб'ектах харчавання і гандлю, якасная пітная вада—гэтае і многае іншае пад кантролем Цэнтра гігіены і эпідэміялогіі, які заўсёды падстаўляе надзейнае плячо. Юбілей службы—агульны. Бо толькі з чысцінёй і здароўем побач крочыць шчаслівы дабрабыт.