Рыбалка – захапленне № 1 у міярчанкі Іны Сіповіч. Паспяхова распачала сезон: выцягнула шчупака на сем кілаграмаў. Пакуль гэта асабісты рэкорд, бо раней з самых важкіх трапляліся толькі «пяцёркі». Цяпер марыць пра шчупака на восем кілаграмаў.

Рыбаловам-аматарам метадыст раённага вучэбна-метадычнага кабінета Іна Сіповіч стала 16 гадоў таму. Сябар прапанаваў ёй з мужам разам парыбачыць. Першы раз выйшла на лёд на возеры Недрава ў Браслаўскім раёне.

– Калені падкошваліся. Баялася праваліцца, – успамінае. – Лавіла на вуду жыўцоў. Ад лункі страшна было адысціся. Так на адным месцы і сядзела.

Цяпер Іна па возеры бегае. Як толькі «страляне» сцяжок на жарліцы – хутчэй да лункі. Хто клюнуў? Выцягваць вялікую рыбу – асаблівы драйв. Аднойчы за хвост шчупака цягнула: у лёсцы заблытаўся.

Разам з тым заўзяты рыбалоў заўважае, што страх трапіць пад лёд нікуды не падзеўся. Таму асцярож-

насць на першым месцы. З сабой заўсёды пяшня. Адна не рыбачыць, толькі ў кампаніі з мужам.

– Гэта магчымасць пабыць разам, адпачыць, – адзначае Іна Валянцінаўна. – Нават калі вяртаемся без улову, гэта не азначае, што рыбалка не ўдалася. Пабылі на прыродзе, надыхаліся свежым паветрам. Асобнае задавальненне – гарачы чай, хлеб з салам, бутэрброды з каўбасой. Бывае, не клюе, прапаноўваю чаю папіць, толькі тэрмас адкрыю – сцяжок. Прыкмета спрацоўвае 50 на 50.

На зімовую рыбалку сямейная пара выпраўляецца на Браслаўшчыну або на азёры ў Себежскі раён. Гэта хобі не для тых, хто любіць даўжэй паспаць у выхадныя. Ад’езд у шэсць раніцы, жарліцы расстаўляюць яшчэ ў прыцемках, на возеры гадзін да трох дня. Летам вудзяць карасей, ляшчоў і лінёў на Міёршчыне.

Стравы з рыбы ў меню пастаянна. Смажаць, вараць юшку, засольваюць ікру, гатуюць катлеты.

– На фарш ідуць буйныя шчупакі. Замарожваю адразу з сырым салам у суадносінах тры да аднаго. Перамолваю ўсё на камбайне – і па пакетах. Пасля застаецца толькі дадаць нацертую на буйной тарцы цыбулю, соль, перац – і на патэльню, – дзеліцца лайфхакам гаспадыня. – Фарш добра захоўваецца. Восенню толькі скончыліся запасы з мінулай зімы. Муж у лютым у водпуску быў, і я дзесяць дзён адпачынку ўзяла. Якраз лёд стаў. Актыўна рыбачылі і за ўвесь час налавілі 34 кілаграмы шчупака.

Кожны выезд на рыбалку мае пісьмовую фіксацыю. Рыбалоўны дзённік муж Павел вядзе каля дзесяці гадоў. Дата, месца рыбалкі, надвор’е, улоў – такую інфармацыю ўтрымліваюць запісы.

– Цікава перачытваць, параўноўваць, прыемна ўспамінаць, – гаворыць Іна.

Любімыя перадачы мужа і жонкі – пра рыбалку. У адной з іх Іна Валянцінаўна даведалася рэцэпт стравы, якую часта гатуе. Дзеліцца ім з чытачамі газеты.

Кацярына Рынкевіч.
Фота з асабістага архіва Іны СІПОВІЧ.