— На 50% здароўе чалавека залежыць ад яго самога, — упэўнена фельчар Чапукоўскага ФАПа Валянціна Пятроўна Пяткевіч.—Не буду арыгінальнай, калі скажу, што крыніца добрага самаадчування — правільнае харчаванне, адсутнасць шкодных звычак і ўмераныя фізічныя нагрузкі. Важны і пазітыўны настрой. Калі злуешся, зайздросціш ці жадаеш камусьці дрэннага, у першую чаргу шкодзіш сабе. 

Час ідзе, а простыя сакрэты здароўя не змяняюцца. Праўда, экалагічныя праблемы і тэхнічны прагрэс дадаюць запісаў у медыцынскіх картках. Як адзначае фельчар, более анкалагічных захворванняў, у тым ліку рака скуры. Калі напрыканцы 70-х на ўчастку было толькі два хворыя на анкалогію, то цяпер іх 11.Распаўсюджваюцца артэрыяльная гіпертэнзія і ішэмічная хвароба сэрца. З 377 дарослых праблемы з ціскам маюць 90. Экраны тэлевізараў і маніторы камп'ютараў пагаршаюць зрок у дзяцей, якіх пад апекай Валянціны Пятроўны—81. У тым ліку 6 дзетак ва ўзросце да года. —Калі прыехала сюды працаваць, на ўчастку было 24 немаўляці да годзіка,—успамінае фельчар.

 —Ва ўсе наступныя гады такая колькасць не паўтарылася.У Чапукі выпускніца Віцебскага медвучылішча трапіла па размеркаванні ў 1978 годзе. Гэта не было "ссылкай". Яна марыла пра медыцыну і правінцыю. Сельскі побыт ведала добра, бо вырасла ў вёсцы Запалоўе на Глыбоччыне. Праз год у маладога фельчара з'явілася ўласная сям'я. З мужам Мікалаем Вячаслававічам, працаўніком ААТ "Любінова",  выгадавалі дачку і сына. Ганна атрымала спецыяльнасць эколага, жыве ў Лепельскім раёне, даглядае сыночка. Яўген застаўся на малой радзіме, працуе акампаніятарам ў Наўгародскім СДК. Таксама падарыў бацькам унучка.Валянціна Пятроўна—часты госць у мясцовай школе. Расказвае дзецям пра важнасць рэжыму дня, правільнае харчаванне, загартоўванне, уплыў на арганізм шкодных звычак. Сярод вучняў ёсць сыны і дачушкі тых хлопцаў і дзяўчат, якія, здаецца, зусім нядаўна самі былі школьнікамі і прыбягалі на ФАП памерыць тэмпературу ці суцішыць боль ва ўдараным калене. 

На вачах фельчара раслі дзеці, развівалася вёска, змяняліся яе ваколіцы. Калі раней спяшалася да хворых па бездарожжы ў гумовых ботах, то цяпер—па чыстым асфальце. Асабліва змяніўся знешні выгляд Чапукоў, калі населены пункт атрымаў статус аграгарадка. У 2007 годзе пераехаў на новы адрас ФАП і ў якасці падарунка на наваселле атрымаў сучаснае абсталяванне. З дапамогай спецыяльных прыбораў праграваецца хворым грудная глетка, грэюцца і дэзынфіцыруюцца горла, нос ці вушы, лечуцца бранхіт і суставы. Штотыднёва па аўторках на ФАП прыязджаюць урач Новапагосцкай амбулаторыі разам з лабарантам, акушэркай і стаматолагам. Падлячыць зубы заўсёды шмат жадаючых. Для гэтага ёсць асобны кабінет і належнае абсталяванне.

 Забяспечана ўстанова неабходнымі медыкаментамі. Часцей набываюць сродкі ад павышанага ціску і праблем з суставамі. У сезон прастуд узрастае попыт на антыбіётыкі і парашкі.Штодзень Валянціна Пятроўна прымае мінімум 3-4 чалавек і да 1-2 наведваецца па выкліку. У большасці за дапамогай звяртаюцца людзі сталага ўзросту. Акрамя аграгарадка абслугоўвае яшчэ 17 вёсак. Летам дабіраецца на веласіпедзе, у халодную пару—пешшу.

—Кіламетры не палохаюць,—гаворыць фельчар. —Галоўнае, чалавеку дапамагчы. За 37 год добра вывучыла сваіх падапечных. Нават сумавала па іх, калі пэўны час  з-за хваробы не выходзіла на працу. Клапоціцца як пра фізічнае здароўе пацыентаў, так і пра іх псіхалагічны настрой. У кабінеце радуюць насычанай зелянінай пакаёвыя расліны. Нельга не ўсміхнуцца і не падзівіцца на мноства яркіх кветак на вялікіх дагледжаных клумбах ля ФАПа. Валянціна Пятроўна прызнаецца, што тут іх куды больш, чым дома, бо там іншых спраў хапае: занятая гаспадаркай і агародам. У якасці адпачынку—красворды і перыёдыка, у тым ліку і медыцынская.

Кацярына РЫНКЕВІЧ.

Фота Казіміра БЛАЖЭВІЧА.