Авторизация
 

Вітольд Ермалёнак стварыў моладзевую інтэрактыўную культурна-гістарычную пляцоўку «Спадчына Міёрскага краю»

 З вясны мінулага года кіраўнік музейнага аб’яднання Міёрскай СШ № 3 імя Героя Савецкага Саюза Ягора Томкі Вітольд Ермалёнак жыве ў асабліва напружаным рытме. Да звычайных экскурсій, сустрэч ля стэндаў, пасяджэнняў, канферэнцый, семінараў, паходаў, удзелаў у фестывалях і шматлікага іншага дадалося стварэнне моладзевай інтэрактыўнай культурна-гістарычнай пляцоўкі «Спадчына Міёрскага краю». Таму ў школе нават па выхадных. Добраахвотна скараціў летні водпуск да дзесяці дзён, толькі каб набрацца сіл ля цёплага мора, а па вечарах працуе над музейнай газетай ці піша чарговую кнігу пра новы турыстычны маршрут – «Пярсцёнак».

 

Радуе Вітольда Антонавіча, што плён уласных намаганняў і шматлікіх памочнікаў прадэманструе шырокай грамадскасці ўжо Ў пятніцу, 27 жніўня. У гэты дзень у актавай зале школы ў 16 гадзін распачнецца прэзентацыя ІТ-лабараторыі і абноўленага гістарычнага музея.

 
Пра будучую падзею гутару з Вітольдам Антонавічам ля новых паліц і шафаў за экспанатамі запасніка, куды да яго час ад часу звяртаюцца полацкія спецыялісты музейнага афармлення, што другі месяц працуюць у суседніх памяшканнях. Яны распрацоўвалі дызайн праекта і ведаюць, як яго рэалізаваць, а вось чым напоўніць стэнды, залежыць толькі ад ініцыятара новай справы. Аповяд пра яе Вітольд Антонавіч пачаў здаля:

 
– У пачатку мінулага года пры фінансавай падтрымцы Еўрасаюза пачаў ажыццяўляцца праект «Разам для грамады і прыроды: узмацненне працэсу развіцця ў Міёрскім раёне праз супрацоўніцтва мясцовай улады і грамадзянскай супольнасці». У яго рамках планавалася выдзеліць гранты на дзесяць ініцыятыў. Кожная з іх павінна была адпавядаць высокім крытэрыям сучаснасці, актуальнасці, перспектыўнасці, крэатыўнасці, цікаўнасці і карысці для шырокай аўдыторыі. У такіх умовах разлічваць на сродкі проста для абнаўлення школьнага гістарычнага музея (за дзесяцігоддзі існавання яго экспазіцыі і экспанаты не ўстарэлі, а вось афармленне патрабавала абавязковай замены) было нерэальна.

 
Пачаўся «мазгавы штурм», да якога актыўна падключыліся найперш дырэктар школы Святлана Пальчэх і пастаянныя мае памочнікі: бібліятэкар Дзіяна Варона, сябра гуртка «Арганаўты мінулага», а цяпер навуковы супрацоўнік музея-запаведніка ў Заслаўі Ігар Кандратовіч. У выніку прыйшлі да агульнай высновы, што школьны музей з дзясяткамі тысяч экспанатаў павінен стаць толькі часткай выразнай сучаснай сістэмы, базай па прапагандзе вялікай гістарычнай спадчыны краю і асновай для зацікаўлення моладзі, і не толькі яе, у пашырэнні і дэталізацыі нашых ведаў пра мінулае Міёршчыны і яе жыхароў.

 
Наш праект «Моладзевай пляцоўкі» знайшоў водгук у рэспубліканскім аб’яднанні «Ахова птушак Бацькаўшчыны», быў падтрыманы ў райвыканкаме, адобраны грамадскасцю. Нарэшце, вытрымаў двухмесячны конкурс і выйграў грант у 60 тысяч еўра, які павінен быць дапоўнены больш сціплымі сродкамі самафінансавання. «Дахам» для яго (па афіцыйнаму – заказчыкам) стала грамадскае аб’яднанне «Міёрская раённая арганізацыя БРСМ», дзякую за такую падтрымку асабіста першаму сакратару Вікторыі Фурс.

 
Непасрэдная рэалізацыя праекта пачалася ў маі 2020 года ініцыятыўнай групай пад маім кіраўніцтвам. Кансультантам у ёй стаў настаўнік гісторыі Максім Філіповіч, бібліятэкарам-асістэнтам – Анастасія Варонька і бухгалтарам – Марына Трашчанка. Мы яшчэ абапіраліся на групу падтрымкі з 15 прадстаўнікоў грамадскасці з розных устаноў і арганізацый раёна. Для ІТ-лабараторыі набылі ноўтбукі, прынтар, ксеракс, потым – мульціборд, інфармкіёск, перфабіндар, ламінатар і іншае абсталяванне. Справа ўвогуле звычайная гаспадарчая, калі б не ператваралася ў руцінную пры правядзенні тэндараў.

 
Наступным крокам стала стварэнне сайта «Моладзевы рэсурсны цэнтр «Спадчына Міёрскага краю» на трох мовах: беларускай, рускай, англійскай. У ім звесткі пра школьны музей, навіны пра нашу дзейнасць і публікацыі ў розных СМІ, ІТ-лабараторыі, супрацоўніцтва, кантакты і іншае. Гэта крыніца інфармацыі і база дадзеных для ўсіх, хто цікавіцца мінулым і цяперашнім раёна. Знаёміць з гісторыяй населеных пунктаў, апавядае пра музеі, іх экспанаты, знакамітых людзей. Гэтыя звесткі зацікавілі дапытлівых вучняў школы, натхнілі некаторых на асабістыя даследаванні. З імі яны ўдзельнічалі ў канферэнцыях рознага ўзроўню, у тым ліку міжнароднай.

 
Мы ж правялі ў інтэрнэце анкетаванне, каб высвеліць інфармаванасць жыхароў раёна пра мінулае Міёршчыны і магчымасць яго вывучэння. У ім прынялі ўдзел звыш 700 рэспандэнтаў. Дарэчы, сайтам ужо карыстаюцца, і не толькі мясцовыя людзі. Нядаўна на ім шукалі звесткі пра вёску Міжрэчча ўнучкі былога ўладальніка маёнтка Аскеркі, сям’я якога трапіла ў Сібір, а потым змагалася з фашызмам у складзе арміі Андэрса. Яны даслалі з Аргенціны здымкі сваіх родных, іх жылля на беразе Вяты.

 
Нямала намаганняў запатрабаваў тэматыка-экспазіцыйны план новага афармлення гістарычнага музея. У ім некалькі тысяч экспанатаў і кожны сфатаграфаваны, змераны, узважаны, апісаны. Выбраць для новых экспазіцый самыя цікавыя, важныя дазволілі кансультацыі з экспертамі музейнай справы і вучонымі-археолагамі. Адначасова вывучалі вопыт афармлення і дзейнасці музеяў у сталіцы, Верхнядзвінску, Германавічах і іншых. Адным з вынікаў такой справы стала падрыхтоўка першага набору паштовак пра мінулае і цяперашняе райцэнтра. Разлічваю, што ён будзе выдадзены масавым накладам.

 
Элементамі «Моладзевай пляцоўкі» з’яўляюцца працяг выдання на новым узроўні музейнай газеты «Міёрская даўніна» і выдавецкая дзейнасць: кніга пра турыстычныя адметнасці «Дзісненскага пярсцёнка» ужо друкуецца, наступная пра славутасці Пагосцкага краю рыхтуецца.

 
Гэта не поўны пералік зробленага ў рамках «Моладзевай пляцоўкі». Рады, што магу не толькі расказаць пра патрэбную і карысную справу для нашай Міёршчыны, але і прадэмастраваць яе вынікі. Запрашаю на прэзентацыю.

 

Леанід МАТЭЛЕНАК

Фота Ігара МАТЭЛЕНКА.

рейтинг: 
Пакінуць каментар
иконка
Посетители, находящиеся в группе Гости, не могут оставлять комментарии к данной публикации.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 30 января 2022
Антон, Виктор, Георгий, Иван, Павел, Савелий, Антонина

Именины 29 января 2022
Иван, Максим, Петр, Неонила

Госці краін

free counters
Партнеры сайта