Авторизация
 

Памяць пра славутага земляка натхняе

 Жыццёвы шлях і постаць Генрыка Дмахоўскага ўражваюць не толькі яго землякоў. Паўстанцу і таленавітаму скульптару, чалавеку трагічнага лёсу прысвечана шмат публікацый, нават кніг на розных мовах: беларускай, польскай, французскай, англійскай. Аднак у іх яшчэ сказана далёка не ўсё. Жыццяпіс нашага земляка працягваецца, памяць жыве. Пра гэта днямі ішла гаворка ў Забалоццеўскай бібліятэцы-клубе на юбілейным мерапрыемстве, прысвечаным 210-годдзю з дня яго нараджэння.

 

Святкаванне юбілею ў рамках рэалізацыі праекта «Разам для грамады і прыроды: Міёрскі раён» сабрала ў Забалоцці дэлегацыі прадстаўнікоў ініцыятывы па стварэнні маладзёжнай інтэрактыўнай культурна-гістарычнай пляцоўкі «Спадчына Міёрскага краю» з СШ № 3 імя Героя Савецкага Саюза Я. Томкі пад кіраўніцтвам дырэктара Святланы Пальчэх і прадстаўнікоў цэнтралізаванай бібліятэчнай сістэмы на чале з яе дырэктарам Таццянай Цыцылінай. Мясцовую ўладу прадстаўляў старшыня Перабродскага сельскага Савета Віктар Дзеравянчык. Работнікі раённай рэдакцыі былі не проста журналістамі, але і стваральнікамі кнігі «Памяць».

 
 Два стагоддзі з большага сцёрлі сляды таго, што ў родных мясцінах, на бацькоўскай зямлі акружала ў дзяцінстве Генрыка Дмахоўскага. Але не ўсё. У час экскурсіі, якую праводзілі гаспадыня – загадчыца бібліятэкі-клуба Людміла Белая – і настаўнік гісторыі СШ № 3 імя Я. Томкі, краязнаўца і стваральнік школьнага аб’яднання музеяў Вітольд Ермалёнак, госці прайшлі сутарэннямі былога сядзібнага дома, пабачылі рэшткі даўніх гаспадарчых пабудоў, палюбаваліся старымі дрэвамі, што захаваліся ад даўняга парку, пазнаёміліся з экспазіцыямі краязнаўчага музея, які апавядае пра нядаўняе мінулае вёскі і яе жыхароў. Гэта здымкі і дакументы, асабістыя рэчы, прадметы побыту і працы, адзенне, вязанне і вышыўкі, цацкі.

 
Пра краязнаўчы напрамак сваёй работы, як адзін з асноўных, гаварыла Людміла Міхайлаўна і на пачатку афіцыйнай часткі, калі больш дакладна – агульнай размовы за кубачкам гарбаты. Цудоўным дапаўненнем стаў відэафільм пра адкрыццё сем гадоў таму на будынку бібліятэкі-клуба памятнай дошкі, прысвечанай Генрыку Дмахоўскаму. Кадры стужкі нагадалі пра людзей, што зрабілі свой унёсак у захаванне памяці пра земляка – Чалавека Сусвету. Зноў жа, самымі ініцыятыўнымі сярод іх аказаліся настаўнікі СШ № 3 імя Я. Томкі і непасрэдна Вітольд Ермалёнак, тагачасны дырэктар школы мастацтваў Баляслаў Чарняўскі з сынам Аляксандрам.

 
 Дарэчы, «вяртанне» Дмахоўскага сучаснікам пачалося з даўняй публікацыі ў раённай газеце, якую падрыхтаваў Вітольд Ермалёнак. Цяпер ён засведчыў, што славутым земляком зацікавіўся яшчэ ў школьныя гады, калі прачытаў кнігу Гедэмана. Працяглы час збіраў звесткі пра рэвалюцыянера і скульптара, нават наведаў Францыю, каб паглядзець на адну з работ – надмагілле Напалеона, што выканана з яго ўдзелам. Гэта натхніла на выданне невялікай кнігі, якую плануе пашырыць.

 
Паступова размова перайшла на тое, што ўвекавечання вартыя многія падзеі, якія адбываліся на Міёршчыне, знакамітыя людзі Дзісны і іншых мясцін. У адным толькі Перабродскім краі такіх не адзін дзясятак.
– Вартыя павагі і нашы сучаснікі, – выказаў сваё меркаванне старшыня сельвыканкама Віктар Дзеравянчык. – У цяперашнім Забалоцці жывуць дружныя, шчырыя людзі, выдатныя працаўнікі. Непадалёку прадпрымальнік Аляксандр Лапуцэвіч адраджае сваю родную вёску Лебедзева. Яе неабходна ўключыць у турыстычны маршрут праз нашы населеныя пункты з багатай гісторыяй і цікавымі архітэктурнымі і прыроднымі помнікамі.

 
Пра рэалізацыю ініцыятывы па стварэнні маладзёжнай культурна-гістарычнай пляцоўкі на базе музеяў СШ № 3 імя Я. Томкі праінфармавала дырэктар гэтай навучальнай установы Святлана Пальчэх і прадставіла аўдыторыі сваіх актывістаў-краязнаўцаў – настаўнікаў і вучняў. Потым дзесяцікласніца Ульяна Вальмус зачытала даклад пра мінулае сядзібы Дмахоўскіх.

 
Набыткамі і планамі па рэалізацыі праекта «Разам для грамады і прыроды: Міёрскі раён» падзялілася кіраўнік цэнтралізаванай бібліятэчнай сістэмы Таццяна Цыцыліна. Яна зацікавілася ініцыятывамі ў гэтым напрамку. Яе меркаванне: усё ў культурна-краязнаўчай рабоце залежыць найперш ад нас саміх. Дарэчы, і яна прывезла на мерапрыемства сваіх памочнікаў-аднадумцаў.

 
Юбілейнае мерапрыемства ў Забалоцці прысвячалася ўшанаванню памяці знакамітага земляка, аднак яго ўдзельнікі закранулі нямала актуальных сучасных гісторыка-культурных праблем. Трэба меркаваць, з’явяцца новыя цікавыя праекты і ініцыятывы. 

 

Леанід МАТЭЛЕНАК

Фотаматэрыял Казіміра БЛАЖЭВІЧА.

рейтинг: 
Пакінуць каментар
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 14 апреля 2021
Ефим, Иван, Макар, Сергей, Мария

Именины 13 апреля 2021
Вениамин, Иван, Иннокентий, Иосиф, Анна

Госці краін

free counters
Партнеры сайта