Авторизация
 

Раённы конкурс прафмайстэрства на Міёршчыне

+
Раённы конкурс прафмайстэрства сярод работнікаў па штучным асемяненні буйной рагатай жывёлы адбыўся на мінулым тыдні на базе ААТ "Туркова". Вітаючы  ўдзельнікаў, старшыня райвыканкама І. Кузняцоў падкрэсліў, што ў гаспадарках, дзе надаецца належная ўвага пакрыццю кароў і цялушак, можна  разлічваць на высокую вытворчасць жывёлагадоўчай прадукцыі.

Ігар Валер'евіч падзякаваў тэхнікам-асемянатарам за працу і выказаў спадзяванне, што кожны пастараецца прадэманстраваць навыкі і ўменні. Аднак галоўная мэта конкурсу не ў вылучэнні мацнейшых, а ў павышэнні прафесіяналізму, бо гэта  своеасаблівы форум, дзе спрактыкаваныя дзеляцца вопытам з навічкамі і ўдасканальваюцца ў майстэрстве. 
 
Перад пачаткам выпрабаванняў дырэктар райплемстанцыі А. Клубань прааналізаваў работу тэхнікаў-асемянатараў за мінулы год. У сельгасарганізацыях раёна атрымалі 11 510 цялят, што на 239 менш, чым у 2014-ым. Выхад маладняку знізілі ў 10 гаспадарках, а найбольш—у ААТ "Мікалаёўскі" (-151), "Любінова" (-81). Пры гэтым быў прырост да 2014 года ў ААТ "Гвардзейскі" (+84), СУП "Павяцце" (+68), "Цітова" (+51), ААТ "Узмёнскі край" (+42).

Сёлета ў першым квартале на фермах нарадзілася 4 639 цялят і зноў адмінусавалі на 117 галоў. Нагнаць адставанне некаторым гаспадаркам не ўдасца, бо летась і сёлета недапрацавалі па асемяненні кароў і цялушак. Між тым, істотна павялічылі выхад маладняку за студзень-сакавік у ААТ "Мікалаёўскі" (+69) і "Любінова" (+67), СУП "Павяцце" (+34). 

Па забеспячэнні выхаду цялят на 100 кароў і цялушак за мінулы год у бясспрэчных лідарах работнікі ААТ "Туркова" (тэхнікі-асемянатары А. Чалала і       Т. Кожух)—144 галавы, а ў разліку на 100 кароў  іх атрымалі  па 117. Усяго на фермах сельгаставарыства нарадзілася 1140 цялят. Высокая і эфектыўнасць асемянення кароў—91%. Але апярэджвае іх ААТ "Міёрскі райаграсэрвіс", дзе 98% пакрытых "пяструшак" далі прыплод. Трэба падкрэсліць, што малады тэхнік-асемянатар з падсобнай гаспадаркі гэтага прадпрыемства І. Загорская працаўладкавалася нядаўна і атрымала першы маладняк летась. Вынікі парадавалі: у разліку на 100 кароў выхад склаў 106 цялят, на 100 кароў і цялушак—108.
Кіраўнік райплемстанцыі не выпадкова акцэнтаваў увагу на эфектыўнасці асемянення, бо кожная семядоза каштуе каля 45 тысяч рублёў, а пры двухкратным асемяненні каровы падчас ахвоты, як таго патрабуе тэхналогія, грашовы расход падвойваецца. Між тым, нярэдка ў гаспадарках пакрываюць жывёлу па 2-3 разы, а яна пры гэтым застаецца ялавай. Каб не дапусціць такога, варта строга захоўваць тэхналогію асемянення і якасна лячыць гінекалагічна хворую жывёлу. Гэта найперш мае дачыненне да ААТ "Папшулі" і  ВУПКУ "Юбілейны", дзе эфектыўнасць асемянення летась склала адпаведна 54% і 46%. Са станоўчага боку адзначана работа тэхнікаў-асемянатараў СУП "Цітова" (Ю. Курган), ААТ "Мікалаёўскі"(В. Брыгіс), "Туркова" (Т. Кожух і А. Чалала), "Міёрскі райаграсэрвіс" (І.Загорская), "Дрыгучы" (В. Паніжнік), "Пад'ельцы" (В. Пінчук), "Чэрасы" (С. Зямец) і шэрагу іншых гаспадарак, дзе эфектыўнасць асемянення жывёлы за мінулы год была вышэй сярэднераённай. 

Найбольшы агульны выхад цялят летась атрымаў ААТ "Мікалаёўскі"—1458 галоў (98 на 100 кароў і цялушак), але да папярэдняга года гаспадарка адмінусавала на 151 галаву, што не радуе. Аднак нельга папракаць тэхніка-асемянатара    В. Брыгіса, які не толькі абслугоўвае вялікі дойны гурт дзвюх аб'яднаных гаспадарак, але і якасна лечыць гінекалагічна хворых кароў. Летась у яго "рабочай зоне" праведзена асемяненне 2276 кароў і цялушак. Для параўнання: у ААТ "Туркова"—1479, у ВУПКУ "Міёрскі" —1513, і ў гэтых гаспадарках працуюць па 2 асемянатары. Сёлета кіраўніцтву ААТ "Мікалаёўскі" нарэшце ўдалося вырашыць кадравую праблему: Л. Цімафеева закончыла спецкурсы пры Віцебскай ветакадэміі і абслугоўвае статак на сіцькоўскім участку.

Летась у сельгасарганізацыях раёна асемянілі 17 237 кароў і цялушак, што на 1086 галоў менш да папярэдняга года. Найбольш адмінусавалі ААТ Любінова" (-184) і "Мерыца" (-160). Многія гаспадаркі не выконваюць даведзеныя заданні, таму планы па атрыманні цялят у 2016-ым і ў наступным го-дзе могуць быць парушаны. Летась рост па асемяненні да ўзроўню папярэдняга года забяспечылі толькі ААТ "Дрыгучы", "Туркова" і "Чэрасы". І сёлета за першы квартал у гаспадарак адставанне. Спрацавалі з "плюсам" толькі ў пяці, а ў ліку лепшых ААТ "Пад'ельцы" (+53), СУП "Павяцце (+53) і ААТ "Гвардзейскі (+51). Пастаўлена задача ў летні сезон забяспечыць высокаэфектыўнае асемяненне максімальнай колькасці кароў і цялушак.

Вядучы спецыяліст абласнога племпрадпрыемства па штучным асемяненні сельгасжывёлы А. Барысенка адзначыў, што Міёрскі раён летась не выйшаў у лік пераможцаў па атрыманні маладняку (выхад цялят у разліку на 100 кароў склаў 81 галаву), але па-ранейшаму значыцца сярод мацнейшых, бо тут працуюць высокапрафесіянальныя спецыялісты і стаж работы  ў многіх значны, ёсць тэхнікі-асемянатары з вышэйшай адукацыяй. Вядучы спецыяліст расказаў пра вынікі праверак некаторых гаспадарак і адзначыў работу па штучным асемяненні ў ААТ "Мікалаёўскі". Нават парэкамендаваў арганізаваць на яго базе раённы семінар. Высока ацэнены не толькі вытворчы прафесіяналізм тэхніка-асемянатара, але ідэальнае вядзенне неабходнай дакументацыі.

У практычным "экзамене" канкурсанты дэманстравалі ўменне падрыхтаваць рабочае месца, адтайвайць гранулы, ацэньваць жыццяздольнасць  семя пад мікраскопам і г. д. Сачылі дырэктар райплемстанцыі А.Клубань і прадстаўнік аблплемпрадпрыемства У. Барысенка.  

Адказвалі канкурсанты і на тэарэтычныя пытанні ў білетах. Многія прыехалі са спецыяльнымі дапаможнікамі, канспектамі, каб перад экзаменам "асвяжыць" свае веды. Як прызналася адна з канкурсантак: "Не страшна, але заўсёды перад прадстаўнічай камісіяй узнікае хваляванне, ад якога многае "вылятае" з галавы". Экзаменаваліся і па правілах вядзення дакументацыі—тэхнікі-асемянатары прывезлі журналы па асемяненні жывёлы. Тэорыю ацэньвалі галоўны заатэхнік-селекцыянер райплемстанцыі В. Найдзёнак і вядучы спецыяліст гэтага ж прадпрыемства І. Смір-нова, ветурач-гінеколаг райветстанцыі В. Бондар.

Пакуль ішлі выпрабаванні, у суседнім памяшканні заатэхнікі-селекцыянеры з дапамогай вядучага спецыяліста аблплемпрад-прыемства А. Арловай больш дасканала асвойвалі праграму па вядзенні камп'ютарнай базы дадзеных аб жывёле. Яе стварэнне—важны крок на шляху да павышэння эфектыўнасці племянной работы ў гаспадарках.

Па выніках выпрабаванняў з улікам вытворчых паказчыкаў лепшымі спецыялістамі па штучным асемяненні БРЖ прызнаны Аляксей Чалала (першае месца) і Таццяна Кожух (другое) з ААТ "Туркова",  Юрый Курган з СУП "Цітова" (трэцяе). Ім уручаны каштоўныя падарункі і граматы ўпраўлення сельскай гаспадаркі і харчавання райвыканкама.

Эліза БЛАЖЭВІЧ.
Фота Казіміра БЛАЖЭВІЧА. 
  


рейтинг: 
Пакінуць каментар
иконка
Каментаваць артыкулы на нашым сайце магчыма толькі ў плыні 360 дзён з дня публікацыі.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 17 января 2021
Александр, Аристарх, Артем, Архип, Денис, Ефим, Иосиф, Климент, Марк, Никанор, Николай, Павел, Прохор, Степан, Терентий, Тимофей, Трофим, Фаддей, Афанасий, Карп, Семен, Филипп

Именины 16 января 2021
Василий, Гордей, Ирина

Госці краін

free counters
Партнеры сайта