Авторизация
 

17 тэхнікаў-асемянатараў з гаспадарак раёна сустрэліся на конкурсе ў Туркоўскім сельскім Доме культуры

1
Калі добра ведаеш прадмет, здаць экзамен можна без папярэдняй падрыхтоўкі. Так і з конкурсам прафмайстэрства для тэхнікаў-асемянатараў, які штогод праходзіць у раёне. З прапанаванымі іспытамі ўдзельнікі кожны дзень сустракаюцца на працы, таму падчас спаборніцтва адчуваюць сябе ўпэўнена. У чарговы раз 17 тэхнікаў-асемянатараў з гаспадарак раёна сустрэліся на конкурсе 21 красавіка ў Туркоўскім сельскім Доме культуры.

Шпаргалкі не патрэбны

Да пачатку спаборніцтва хвілін дзесяць. Адны ўдзельнікі ўжо занялі месцы ў зале, іншыя яшчэ прагульваюцца на пляцоўцы ля СДК. Зусім не бачна, каб хтосьці хваляваўся, напружана паўтараў матэрыял ці раскладаў па кішэнях шпаргалкі. У гэтым  няма неабходнасці.
– Конкурсныя заданні – гэта тое, з чым штодня маем справу, – заўважае Іван Протас з ААТ «Туркова». – Тэхнікам-асемянатарам у гаспадарцы працую тры гады і на конкурсе не ўпершыню. На перамогу не разлічваю, для гэтага трэба мець куды большы стаж. 
– Удзел у конкурсе – магчымасць даведацца штосьці новае, – дадае Міхаіл Няміра з ААТ «Міёрскі райаграсэрвіс». – У гэтай прафесіі я толькі паўтара года, таму далёка не ўсё здаецца простым.
Стаж тэхніка-асемянатара ААТ «Мікалаёўскі» Віктара Брыгаса налічвае 15 гадоў. Да гэтага быў ветурачом. Ёсць чаму ў яго павучыцца калегам.
– Ды што тут вучыць? Галоўнае, каб жаданне было, – заўважае Віктар Мікалаевіч. – У гаспадарцы пад маім наглядам каля 1 200 галоў матачнага статка і больш за сто цёлак. Апошнія на бяспрывязным утрыманні. У гэтым свой плюс, бо лягчэй выявіць жывёлу ў ахвоце. У стойле заўважаць гэта складаней. Часам даяркі падказваюць, на якую карову трэба ўвагу звярнуць. Вопытная даярка – добры памочнік у нашай справе.

Мінусы трэба выпраўляць

Пра тое, што здароўе буйной рагатай жывёлы, у тым ліку рэпрадукцыйнае, – агульны клопат жывёлаводаў, заўважалі падчас нарады, з якой пачалі сустрэчу. Падвялі вынікі па ўзнаўленні буйной рагатай жывёлы за першы квартал года, абазначылі задачы на летні перыяд. Дырэктар філіяла «Міёрская племстанцыя» Анатоль Клубань адзначыў, што за мінулы год у раёне недаатрымалі 588 галоў прыплоду. Пайшлі ў мінус УП «Цітова», ААТ «Дрыгучы», «Туркова», «Пад’ельцы», КУП «Язна» і іншыя гаспадаркі. Сёлета ў першым квартале таксама ёсць мінусы, якія трэба імкнуцца выправіць.
Звярнулі ўвагу тэхнікаў-асемянатараў на належнае вядзенне дакументацыі, санітарны стан інструментаў, абсталяванне пунктаў штучнага асемянення, абазначэнне біркамі нованароджаных цялят і так далей. Па сутнасці, гаварылі пра тое, што добра вядома. Між тым паўтарэнне лішнім не бывае.

І тэорыя, і практыка

Пасля абмеркавання актуальных пытанняў перайшлі да конкурсу, які нагадваў экзамен з дзвюх частак. Тэарэтычныя веды правяралі ветурач-гінеколаг ветстанцыі Юрый Корсак і галоўны заатэхнік племстанцыі Ірына Смірнова. Практычныя навыкі ацэньвалі дырэктар племстанцыі Анатоль Клубань з калегай – вядучым заатэхнікам Ларысай Корсак. Канкурсанты павінны былі паказаць алгарытм падрыхтоўкі матэрыялаў для асемянення. Адзін з элементаў – адтайванне саломінак і гранул. 
– Тэмпературу вады для адтайвання – ад 37 да 38 градусаў – нават без тэрмометра вызначаю, – заўважае Таццяна Дзям’янава з ААТ «Пад’ельцы», якая першай прыйшла на практычны экзамен і хвіліны за дзве беспамылкова справілася з заданнем.
Надоўга ля століка з рабочым інвентаром ніхто з удзельнікаў не затрымліваўся. Як табліцу множання, кожны ведае, што пінцэт трэба апрацоўваць спіртам, саломінку трымаць у гарачай вадзе 20 – 30 секунд, а асемяніць карову неабходна на працягу 15 хвілін пасля адтайвання біяматэрыялу.
Тэорыю таксама здавалі, што называецца, на раз. Тэхнік-асемянатар з ААТ «Любінова» Людміла Усцінава выцягнула білет № 8. У ім тры пытанні. Першае, да прыкладу, гучыць так: «Выбар аптымальнага часу асемянення кароў і цёлак. Палавое ўзбуджэнне, ахвота, авуляцыя».
– Усе пытанні ў білеце лёгкія, – гаворыць канкурсантка. – Толькі мне куды прасцей справу рабіць, чым на словах тлумачыць. Работу сваю ведаю.
Дзевяць гадоў таму Людміла Генадзьеўна з-за прылаўка магазіна перайшла ў жывёлагадоўчую галіну. З абавязкамі тэхніка-асемянатара азнаёмілася на месячных курсах у Віцебску і з таго часу паспяхова выконвае іх на практыцы. 
 
Чацвёрка лідараў

Экзамен для прафесіяналаў доўжыўся менш за гадзіну. Пасля чайнай паўзы сабраліся ў зале павіншаваць выдатнікаў.
Як заўважыла журы, пры вызначэнні пераможцаў разам з іх выступленнем на конкурсе ацэньвалі і вынікі штодзённай працы. Адзін з паказчыкаў – выхад цялят на сто кароў за мінулы год. 
У ліку найлепшых чацвёра тэхнікаў-асемянатараў. Трэцяе месца падзялілі Леанід Паніжнік з ААТ «Дрыгучы» і Людміла Усцінава з ААТ «Любінова». На другім Вольга Карзянок з УП «Чэрасы». Першае месца прысудзілі Аляксандру Ізаітку з СУП «Цітова». Ён прадставіць Міёршчыну на абласным спаборніцтве, якое адбудзецца ў маі.

Кацярына РЫНКЕВІЧ
Фотаматэрыял Казіміра БЛАЖЭВІЧА. 
рейтинг: 
Пакінуць каментар
иконка
Посетители, находящиеся в группе Гости, не могут оставлять комментарии к данной публикации.
Мы ў сацыяльных сетках
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 21 мая 2022
Адриан, Арсений, Иван

Именины 20 мая 2022
Антон, Давид, Иван, Иосиф, Михаил, Степан, Фаддей, Семен

Госці краін

free counters
Партнеры сайта