На базе УП "Чересс" провели учёбу-аттестацию

 У сельгаспрадпрыемствах раёна працуюць 19 тэхнікаў-асемянатараў, за мінулы год памяняліся тры спецыялісты гэтай сферы. А яны запатрабаваныя: ад работнікаў па штучным асемяненні матачнага пагалоўя буйной рагатай жывёлы залежыць не толькі колькасць прыплоду, але і прадуктыўнасць дойных гуртоў. Таму на  базе УП “Чэрасы” правялі іх вучобу-атэстацыю. 

Спачатку дырэктар райплемстанцыі Анатоль Клубань падвёў вынікі агульнай работы за мінулы год. Потым адбыўся практыкум па вядзенні дакументацыі.


Спраў у тэхнікаў-асемянатараў шмат. Летась яны абслугоўвалі статак у 10 тысяч 963 каровы, гэты гурт за год павялічыўся на 69 галоў. Ад іх атрымалі 10 тысяч 612 цялят, 94 у разліку на 100 кароў і пяршачак, толькі на сто кароў — 74. Вынік добры, лічбы самыя вялікія ў вобласці. Толькі ў 2017-м паказчыкі па атрыманні прыплоду на Міёршчыне былі крышачку большыя. Да таго ж, надой на карову — 2 тысячы 994 кілаграмы, што таксама на 127 кг менш папярэдняга года. Сітуацыя з прадуктыўнасцю жывёлагадоўлі на Міёршчыне не з горшых, але працэс зніжэння надояў закрануў усю вобласць. Цяпер на Віцебшчыне робяцца захады па выпраўленні становішча. Яны шматвектарныя, адным з напрамкаў з’яўляецца павышэнне адказнасці і кваліфікацыі тэхнікаў-асемянатараў па безумоўным захаванні тэхналогіі, іх вучоба і атэстацыя.


З гэтай мэтай на сустрэчу з работнікамі жывёлагадоўлі Міёршчыны прыбылі галоўны спецыяліст па асемяненні буйной рагатай жывёлы Віцебскага племпрадпрыемства Уладзімір Барысенка і выкладчыца акадэміі ветэрынарнай медыцыны Наталля Бабаянц.


 Гутарку з аўдыторыяй Уладзімір Аляксандравіч пачаў з практычных пытанняў. Ён азнаёміў з патрабаваннямі па належным афармленні і ўтрыманні пунктаў штучнага асемянення (на ўзроўні медыцынскіх кабінетаў!), практыцы выяўлення статка ў ахвоце (гэтым павінны займацца ўсе работнікі ферм пры адпаведнай аплаце), арганізацыі прагулак матачнага пагалоўя (як мага большымі гуртамі) і па іншых напрамках дзейнасці. Кожны момант патлумачыў прыкладамі рэальнай арганізацыі ўзнаўлення пагалоўя ў лепшых гаспадарках. Потым настаў час больш спецыфічных пытанняў — калі і як весці асемяненне, якім чынам размарожваць сперму, калі, якія і як выкарыстоўваць медыцынскія прэпараты…


Больш паглыблена гэтыя і іншыя пытанні тэхналогіі асемянення прыпаднесла аўдыторыі Наталля Віктараўна.
З кожным тэхнікам-асемянатарам Уладзімір Аляксандравіч правёў асабістую гутарку па дакладным веданні тэхналогіі справы, якой яны прафесійна займаюцца. 


Гэтая вучоба-атэстацыя — толькі першы этап плануемай работы ў напрамку ліквідацыі адставання ў малочнай жывёлагадоўлі. Іншыя спецыялісты галіны, работнікі кантралюючых органаў наведаюць кожную ферму, каб выявіць прычыны, што стрымліваюць рост надояў, ліквідаваць парушэнні тэхналогіі. 

Фотаматэрыял аўтара.

Леанід МАТЭЛЕНАК.

0 комментариев

Добавить комментарий

Информация
Комментировать статьи на сайте возможно только в течении 360 дней со дня публикации.