Россыпы журавін, фігуры жураўлёў, багацце дароў прыроды, рукатворны дэкор, забавы на любы густ, цёплыя ўсмешкі гаспадароў… Добрая восеньская казка панавала на падворках сельсаветаў, якія напоўнілі экасвята мясцовым каларытам.

Край паляўнічых і рыбаловаў – Пераброддзе. Штораз падкрэсліваюць гэта ў афармленні падворка. У вобразах паляўнічага і рыбачкі вітаюць гасцей старшыня сельвыканкама Віктар Дзеравянчык і загадчык Забалоццеўскай бібліятэкі-клуба Людміла Белая. Можна сфатаграфавацца ў паляўнічай фотазоне, пагуляць у дартс, праспяваць тэматычныя прыпеўкі, згуляць у бяспройгрышную латарэю, вывудзіўшы рыбку са шчаслівым нумарам са стылізаванага возера.

Свая рыбалка на падворку Язненскага сельсавета. У якасці рыб тут летні жаночы абутак, які не так проста зачапіць на кручок. Дамашнім хлебам частуюць Уладзімір і Іна Пашковічы. «Другі хлеб» язненцы выкарысталі як рэквізіт для бульбянога хакею. Перанесці клубень качаргой у кацялок – задачка не з простых.

 Згуляць у гольф прапаноўваюць на туркоўскім падворку. Замест шароў – бульба.

– Можна сфатаграфавацца ў фотазоне «Балота Ельня». З жыццём нашага месцейка знаёміць фотавыстава. Асобны куточак прысвечаны 80-годдзю Перамогі, – праводзіць экскурсію загадчык Туркоўскага СДК Алена Кадушкевіч.

Падворак Мікалаёўскага сельсавета вабіць банерам у вясковым стылі. Кружыць гасцей у імклівым танцы жыхарка Бычыншчына Ніна Шупейка ў вобразе Журавінавай каралевы, спявае для гасцей загадчык Мікалаёўскага клуба Ігар Мятла. Упрыгожваюць падворак работы Наталлі Буда з Сіцькова ў тэхніцы алмазнай мазаікі.

Магніцікі на драўляных спілах з яльнянскімі пейзажамі, вязаныя бірулькі ў выглядзе журавінак і іншыя рэчы на падворку Міёрскага сельсавета прадстаўляе майстрыца з райцэнтра Жанна Пушкель. Частуе яблыкамі са свайго сада і прапаноўвае драўляныя вырабы для кухні Мікалай Дуброўскі з Мацюкоў. У бібліятэкара Чэраскай бібліятэкі Валянціны Пальчэўскай можна набыць журавіны ў цукровай пудры. Дзейнічае лялечны тэатр Чэраскага СДК. Кіраўнік музейнага аб’яднання СШ № 3 імя Героя Савецкага Саюза Я. Томкі Максім Філіповіч з вучнямі праводзяць віктарыну на веданне прадметаў сельскага побыту.

 З адметнасцямі Міёршчыны знаёміць інтэрактыў, які на падворку Новапагосцкага сельсавета прапаноўвае гасцям настаўніца Чапукоўскай СШ Іна Гродзь. Абавязкова залюбуешся пейзажамі, лялькамі, мылам ручной работы і іншай прыгажосцю, якую стварае яе калега Таццяна Дубніцкая. Загадчык Чапукоўскага СДК Вераніка Хаданёнак запрашае пагуляць у «Жураўліны калаўрот».

Барабан «Поля цудаў» кру- цяць на павяцкім падворку. Яблыкі са свайго саду, мёд з уласнага пчальніка, сабраныя на балоце журавіны прапаноўвае Андрэй Чарнаок. З аграсядзібай «Ля вадаспада» знаёміць Іна Урбановіч. Хатнія і вулічныя кветкі розных відаў і гатункаў прапаноўвае Галіна Шук з Паташні. Вырошчвае расліны яе дачка Кацярына.

Шпарка ідзе гандаль у «Лізавецінай лаўцы» на падворку Узмёнскага сельсавета.

– Сыр з казінага малака амаль увесь прадала. Памідоры, бульбу, цыбулю разабралі. Яйкі таксама разышліся, – расказвае гаспадыня Лізавета Грызлюк.

 Загадчык Узмёнскага СДК Крысціна Пасцеева ў вобразе цыганкі прадказвае гасцям будучыню. Традыцыйны пачастунак ад узмёнцаў – юшка з пеўня. Карыстаецца попытам медавуха мясцовага пчаляра Андрэя Сцепулёнка.

Колькі семечак у адной журавінцы? Колькі часу захоўваюцца журавіны? Азадачваюць пытаннямі на дзісненскім падворку Яўген Налівайка з гарадскога Дома культуры і ўдзельніца самадзейнасці Валянціна Швед у вобразе Журавінкі. «Забаўкі дзяўчынкі-журавінкі» прапаноўвае намеснік дырэктара па выхаваўчай рабоце Дзісненскай СШ імя М. Кузьміна Алена Красоўская. Пытанне, колькі гадоў жывуць жураўлі, выклікае цяжкасць ва ўдзельнікаў. Аказваецца, у няволі птушка жыве ў сярэднім 50 гадоў. Быў выпадак, калі журавель дажыў да 87. Упрыгожваюць падворак фотазона і вырабы майстроў Дзісненскага гарадскога Дома рамёстваў. У ліку святочных фішак – чай з Ельні. Заўважаюць: на «Славянскім базары» яго ра- забралі ўміг. Багаты стол накрылі на падворку гаспадыні з клуба «Цвецінскія прысмакі». Прапаноўваюць кулінарныя загадкі і смачныя пачастункі.

Прагулка па сельскіх падворках нібы вандроўка па казачных астраўках. На кожным свае героі і сюжэт – цікавы, вясёлы, адметны. Хочацца затрымацца ў добрай восеньскай казцы. 

Кацярына Рынкевіч.
Фотаматэрыял Казіміра Блажэвіча.