Менавіта такімі высокімі паняццямі вызначаецца галоўнае дзяржаўнае свята, якое наша краіна штогод адзначае 3-га ліпеня. Шануюць яго і на Міёршчыне. Па традыцыі ў Дзень Незалежнасці на плошчы ля Дома культуры сабраліся прадстаўнікі адміністрацыі раёна на чале з І. В. Кузняцовым, дэлегацыі працоўных калектываў, грамадскіх аб'яднанняў, моладзь, каб аддаць даніну павагі ветэранам і тым, хто змагаўся і загінуў за свабоду і мірнае неба над галавой. А вось саміх вызваліцеляў ужо зусім няшмат. Час няўмольны, у нашым раёне засталося 8 ветэранаў-інвалідаў Вялікай Айчыннай вайны і 32 удзельнікі. Сярод іх Аляксандр Емяльянавіч Лапечанкаў і Антоній Іосіфавіч Рубанік. Нягледзячы на паважаны ўзрост, не прыйсці ў гэты дзень на плошчу яны палічылі для сябе немагчымым.

 Адкрываючы мерапрыемства, вядучы В. С. Мядзюха нагадаў, што прайшло 69 гадоў з тае пары, як адгрымелі апошнія баі ў Беларусі. Нашы землякі ўнеслі вялікі ўклад у барацьбу з фашызмам, шматлікія з іх паклалі на алтар перамогі і незалежнасці свае жыцці. У знак павагі да герояў, якія загінулі, вызваляючы Міёршчыну, і ў напамін, што памяць пра іх жыве ў нашых сэрцах вечна, усклалі вянкі да абеліска воінам-вызваліцелям райцэнтра.

Затым урачыстае шэсце рушыла на плошчу Загінуўшых барацьбітоў. На грудзях — чырвона-зялёныя стужкі, у руках — паветраныя шары, сцяжкі. Настрой радасці і гордасці суправаджаў удзельнікаў у пешым страі па галоўных вуліцах горада.

Ля вечнага агню застыў ганаровы каравул школьнікаў. Урачысты мітынг-рэквіем загадчык аддзела па ідэалагічнай рабоце, культуры і справах моладзі райвыканкама А.С. Тронькін аб'яўляе адкрытым. Слова трымае старшыня раённага Савета дэпутатаў Р. В. Парфёненка. Яна гаварыла пра страты і разбурэнні, якія пацярпела краіна ў гады Вялікай Айчыннай вайны, пра подзвіг і мужнасць нашых салдат дзеля шчаслівага жыцця будучых пакаленняў.

 —Высокі гонар і адказнасць для міярчан — быць нашчадкамі Вялікай Перамогі і славы папярэднікаў, захоўваць традыцыі адзінства, дабівацца рэальных вынікаў у працы на дабрабыт сям'і і свайго краю, — падкрэсліла Раіса Васільеўна. — Міёршчына з кожным годам прыгажэе, далейшае развіццё нашага раёна залежыць ад шматлікіх фактараў, у тым ліку ад кожнага з нас. Толькі мы самі зможам захаваць дасягнутае і дабіцца большага.

Старшыня райсавета дэпутатаў выказала словы ўдзячнасці ветэранам за нашу свабоду і незалежнасць, пажадала ім здароўя і мірнага неба над галавой. 

Раённы ваенны камісар С. І. Жабёнак нагадаў старонкі гісторыі, як змагаліся воіны за вызваленне нашай краіны і якіх неймаверных намаганняў каштавала ім перамога.

 Прадстаўнік моладзі Міёршчыны, інспектар дзяржаўнага пажарнага нагляду Міёрскага аддзела па надзвычайных сітуацыях Д. Плотнікаў адзначыў, што Дзень Незалежнасці для сучаснага пакалення — асаблівае свята, якое сімвалізуе мужнасць, адвагу, стойкасць і патрыятызм. І ўпэўніў, што маладыя з гонарам працягваюць гераічныя традыцыі нашых дзядоў і прадзедаў, шануюць памяць герояў.

У знак удзячнасці за вызваленне нашай радзімы і ў памяць аб воінах-інтэрнацыяналістах удзельнікі мітынгу ўсклалі вянкі і гірлянды да брацкай магілы і мемарыялу "Чорны цюльпан". Ушанавалі памяць пра герояў хвілінай маўчання.

 Шмат добрых слоў, прыгожых пажаданняў прагучала ў адрас ветэранаў. Ад раённай арганізацыі рэспубліканскага аб'яднання "Белая Русь" салдатам вайны ўручылі падарункі, якія будуць нагадваць, што пра іх заўсёды памятаюць, клапоцяцца, пастаянна берагуць.

Наталія СТАНКЕВІЧ.

Фота Казіміра БЛАЖЭВІЧА.