Алена БАСІКІРСКАЯ

Фотаматэрыял Казіміра БЛАЖЭВІЧА

76 гадоў нас аддзяляе ад страшнай даты, калі пачалася Вялікая Айчынная вайна. На плошчы Памяці загінуўшых барацьбітоў 22 чэрвеня сабраліся прадстаўнікі раённай улады, Савета дэпутатаў, грамадскіх арганізацый, устаноў і прадпрыемстваў горада, усклалі жывыя кветкі да манумента і ўшанавалі памяць хвілінай маўчання. Правяла мітынг маладзёжны лідар Вікторыя Пяткевіч.

Навуковы супрацоўнік гісторыка-этнаграфічнага музея Вольга Пупіна расказала, што літаральна з першых дзён землякі ўзняліся даць адпор ворагу, створаны групы і атрады. Аднак фронт імкліва набліжаўся, вораг наступаў, палалі вёскі, лілася кроў. Тэрыторыя раёна цалкам захоплена 5 ліпеня 1941-га. Дзісна акупіравана 30 чэрвеня. Фашысцкае камандаванне адразу прыступіла да "новага парадку".

Старшыня ветэранскай арганізацыі Часлаў Кашкур нагадаў, што ў раёне засталося 14 удзельнікаў Вялікай Айчыннай, ім усім за 90 гадоў. Паважаем і любім сваіх ветэранаў. Мірнага неба пажадаў сучаснікам Часлаў Станіслававіч, а калі змагацца — то толькі на спартыўнай ніве.