Плавалi – ведаем

Для жыхароў перавулка Свярдлова ў Міёрах раніца 20 чэрвеня была зусім не добрай. Пасля працяглага начнога дажджу змаглі выйсці на вуліцу толькі ў гумовых ботах. Падворкі, агароды побач з імі аказаліся ў вадзе. Аднаму з навасёлаў давялося вёдрамі выліваць ваду з дома, дзе нядаўна зрабілі рамонт.

Затапленні для жыхароў перавулка сталі звыклай з’явай. Падтаплівае падворкі падчас вясновых паводак, восеньскіх дажджоў, летніх ліўняў. Аднак з бедствам такога маштабу не сустракаліся даўно. 
– Вада пад хатай, ужо пад лагі падыходзіць.
– У гараж зайсці не магу.
– Што ў агародзе вырасце? Пара рыс садзіць.
– І хто цяпер урон кампенсуе?
Абурэнне гараджан зразумелае. Не першы раз яны ў водным палоне, не першы раз ім абяцаюць выправіць сітуацыю, але як толькі ліне дождж, так і паплылі. Прычына праблемы – у ліўнёвай каналізацыі.

– Ліўнёўка не спраўляецца з вялікай колькасцю ападкаў, – заўважае начальнік участка добраўпарадкавання УП ЖКГ Аляксей Смерцьеў. – Пасля начнога дажджу падтопленымі аказаліся і іншыя ўчасткі ў горадзе, аднак на перавулку Свярдлова сітуацыя найбольш крытычная. Пасля пяці раніцы прывезлі сюды мотапомпы, ваду адкачаем. Прымем меры, каб такіх праблем не ўзнікала.
У тое, што з навадненнем больш не сутыкнуцца, жыхары перавулка вераць слаба, і ўсё ж надзеі на гэта не губляюць.

Кацярына РЫНКЕВІЧ
Фотарэпартаж Казіміра БЛАЖЭВІЧА

0 комментариев

Добавить комментарий

Информация
Комментировать статьи на сайте возможно только в течении 360 дней со дня публикации.