Варта нагадаць, што ў час Вялікай Айчыннай вайны па ўсёй тэрыторыі Беларусі праходзілі жорсткія баі паміж савецкай і нямецкай арміямі. У многіх рэгіёнах актыўна дзейнічалі партызанскія атрады. Пасля заканчэння баявых дзеянняў тэрыторыі паўсюль размініравалі, аднак боепрыпасы, якія могуць дэтанаваць, знаходзяцца і цяпер. 

Снарады той далёкай вайны асабліва небяспечныя для дзяцей. Пачынаюць іх распілоўваць, а ўнутры ёсць дадатковы дэтанатар. Чыгунныя корпусы мінамётных мін расколваюць малатком, з гранат выбухное рэчыва проста выкалупліваюць. Такія дзеянні могуць стаць прычынай няшчасных выпадкаў, наступствы ад якіх часта надта цяжкія.

 

Так, 11 сакавіка летась у Дубровенскім раёне ў выніку разбірання патрона часоў Вялікай Айчыннай вайны падлетак застаўся без пальцаў рукі. 

Страшная трагедыя здарылася сёлета ў сакавіку ў вёсцы Вешаўка Бярэзінскага раёна Мінскай вобласці. Трое дзяцей падарваліся на снарадзе часоў ІІ Сусветнай вайны. 8- і 9-гадовыя хлопчыкі загінулі на месцы, а 11-гадовы з цяжкімі траўмамі быў дастаўлены ў бальніцу. 

Гэта не адзінкавыя выпадкі ў Беларусі, калі дзеці гінуць ці атрымліваюць калецтвы з-за небяспечных знаходак. 

Летам адказнасць дарослых за дзяцей павялічваецца ўдвая! Бацькі павінны ведаць, чым заняты яго сын ці дачка, дзе і з кім бавяць час. Штодзённа вык-лікайце іх на даверлівыя гутаркі, тлумачце правілы бяспекі і як паводзіць сябе ў надзвычайнай сітуацыі.