Не паспее лёд скаваць вадаёмы, як ту-ды спяшаюцца аматары зімовай рыбалкі. У пагоні за асалодай і трафеямі, яны часам забываюцца на меры бяспекі. Да таго ж, выходзячы на тонкі лёд, падаюць дрэнны прыклад дзецям. 

Часам удаецца пазбегнуць ці вырвацца з ледзянога палону. Так, у пачатку сту-дзеня мінулага года на Вілейскім вадасховішчы пяцёра мужчын, рухаючыся да берага возера, пачулі пад сабой трэск ільду. Адразу патэлефанавалі ў МНС. З дапамогай дошак і вяровак іх даставілі на бераг. Напрыканцы лютага ў Брагінскім раёне Гомельскай вобласці ў ледзяной пастцы апынуліся муж і жонка, якія прыехалі парыбачыць. Зайшлі на сярэдзіну возера і праваліліся пад лёд. З вады выбраліся самастойна, але дабрацца да берага сіл не засталося. Супрацоўнікі МНС з дапамогай выратавальнай дошкі транспарціравалі лю-дзей на бераг. 

Калі дарослыя выходзяць на лёд, ведаючы пра небяспеку, то дзецьмі часта кіруе выключна цікаўнасць. Адсутнасць жыццёвага вопыту, жаданне "рызыкнуць" і звычайная дзіцячая бестурботнасць прыводзяць да трагедыі. У сярэдзіне лютага ў Столінскім раёне патануў падлетак. Катаўся на каньках і не вярнуўся дадому ў вызначаны час. Занепакоены бацька адправіўся на пошукі. На беразе ўбачыў рэчы сына, а ў рацэ—палонку. Цела хлопчыка дасталі мясцовыя жыхары.  У тым жа месяцы двое падлеткаў прагульваліся ўвечары па возеры ў Брэсце. Адзін праваліўся пад лёд, другі стаў яго выцягваць. На дапамогу не клікалі. Дарослыя не адразу заўважылі падлеткаў, выратаваць паспелі толькі аднаго.

Прыведзеныя трагічныя прыклады павінны яшчэ раз прымусіць задумацца дарослых і дзяцей пра паводзіны на льдзе і выконваць пэўныя правілы бяспекі.

Абавязкова для рыбаловаў:

*свідраваць лункі на адлегласці не менш за 5-6 метраў адну ад другой, каб не дапускаць вялікіх нагрузак на лёд;

*для ўзмацнення апоры побач з лункай трэба пакласці прынесеную з сабой дошку;

*нельга збірацца вялікімі групамі ля "ўдалай" лункі;

*неабходна мець з сабой шнур даўжынёй 12-15 метраў, на адным канцы якога мацуецца груз, а на другім—пятля.

Першая дапамога тым, хто праваліўся пад лёд:

*крыкніце, што ідзяце на дапамогу, гэта надасць пацярпеламу сіл і ўпэўненасці;

*набліжайцеся толькі лежачы, каб не праваліцца самому;

*у якасці выратавальных сродкаў выкарыстоўвайце дошкі, шасты, шчыты, вяроўкі, лыжы, звязанае адзенне, рамяні і да т.п.;

*асцярожна выцягвайце пацярпелага да берага ў той бок, з якога ён прыйшоў;

*дзейнічаць трэба хутка і рашуча, бо чалавек у вадзе губляе сілы, замярзае і можа пагрузіцца пад лёд;

*калі пацярпелага дасталі з вады, неабходна адразу адвесці яго ў цёплае памяшканне, пераапрануць у сухое адзенне, расцерці, напаіць гарачым напоем.

Перыяд бяспечнага знаходжання чалавека ў вадзе пры яе тэмпературы +24 складае 7-9 гадзін, пры +5-+15—ад 3,5 да 4,5 гадзін, тэмпература +2-+3 смяртэльная праз 10-15 хвілін, пры -2 смерць можа наступіць праз 5-8 хвілін.