Адным ударам
Дзевяць год пазбаўлення волі з адбываннем пакарання ў папраўчай калоніі ва ўмовах агульнага рэжыму — такі прыгавор вынесены саракавасьмігадовай жанчыне, вінаватай у забойстве свайго сужыцеля.
Вольга і Сяргей (імёны зменены) жылі разам другі год. Гасцей да сябе не запрашалі, суседзям не перашкаджалі, але ціхім і спакойным іх сумеснае пражыванне назваць нельга. Абодва злоўжывалі спіртным. Раней Вольга была пазбаўлена бацькоўскіх правоў у адносінах да трох дзяцей. Мужчына раўнаваў сужыцельніцу, з-за гэтага здараліся сваркі і скандалы. Неаднаразова знаёмыя, у якіх прасілася пераначаваць жанчына, заўважалі на яе целе сінякі і ранкі. Пабоі былі лёгкімі, таму за медыцынскай дапамогай Вольга ніколі не звярталася.

У тую лістападаўскую нядзелю Вольга і Сяргей збіраліся з раніцы паехаць на могілкі. Аднак не знайшлі транспарт, і накіраваліся ў госці да знаёмых. Там у кампаніі распівалі спіртное, затым вярнуліся дадому.
Распачатую раніцай справу вырашылі працягнуць пасля абеду. Толькі ўжо ўдваіх. Меліся дзве бутэлькі віна. Калі закончыліся цыгарэты, Сяргей адправіўся ў магазін. Па дарозе сустрэў знаёмага, які нагаварыў шмат непрыемнага пра яго сужыцельніцу Вольгу. Вярнуўшыся дадому, разагрэты алкаголем і пачутымі словамі, Сяргей стаў сварыцца. Стараючыся не звяртаць ўвагі, Вольга сядзела на ложку і наразала каўбасу. Раптам—удар кулаком у вуха. Жанчына таксама не адрэагавала. Тады сужыцель схапіў яе за каўнер світэра. Каб пазбегнуць новых удараў, Вольга паспрабавала выйсці ў другі пакой, але Сяргей не збіраўся яе адпускаць. У руках жанчыны быў нож. Адным ударам у шыю яна вызвалілася з рук сужыцеля і пазбавіла яго жыцця. Усвядоміўшы, што здарылася, Вольга пабегла да знаёмых, з якімі раніцай выпівалі. Адтуль выклікалі міліцыю.

 

На судзе сваю віну Вольга прызнала поўнасцю, аднак з вынесеным пакараннем не згадзілася. Падала скаргу з просьбай зменшыць тэрмін пакарання. Абласная судовая калегія па крымінальных справах вызначыла, што няма аб'ектыўных прычын змяняць прыгавор.

 

За крок ад забойства
Пасля працоўнага дня мужчына выпіваў. Дадому вярнуўся познім вечарам і вырашыў яшчэ дабавіць. Усплеск энергіі, атрыманай ад алкаголю, выліўся ў сямейны скандал. У сварцы з жонкай, мужчына ўдарыў яе кулаком у грудзі. Ад удару яна ўпала на канапу. Наваліўшыся зверху, муж стаў сціскаць жонцы шыю, пагражаючы забойствам.
Сваю віну на судзе прызнаў поўнасцю, папрасіў прабачэння ў пацярпелай. Жонка даравала. За свой учынак галава сям'і і бацька двух непаўналетніх дзяцей атрымаў тры месяцы арышту.

 

Святлана РАМАНОЎСКАЯ,
намеснік пракурора.