Под зорким глазом врачей в Новопогостской амбулатории
gazeta 24-12-2016, 15:15 0 ЗдароўеНовапагосцкая амбулаторыя размясцілася ў ціхім завулку насупраць касцёла Найсвяцейшай Тройцы. Сталыя жыхары сведчаць, што будынак яшчэ даваенны, а ўзводзіўся як плябанія для ксян-дза. Святары там жылі, таму месца—намоленае.
Асабістае знаёмства
У Новапагосцкай амбулаторыі працуюць 15 чалавек пад кіраўніцтвам урача агульнай практыкі, сонечнай і жыццярадаснай Таццяны Даргель. Работнікаў амбулаторыі трапна характарызуюць словы вядомага рускага крытыка В. Бялінскага: "Патрыятызм, чый бы ні быў, даказваецца не словам, а справай." Дас-ціпныя, арганізаваныя, адказныя і ветлівыя, большасць з іх жывуць у Новым Пагосце ці паблізу і працуюць звыш 20 год менавіта ў гэтай установе. Таццяна Іванаўна пазнаёміла з персаналам.
—Нашы работнікі не толькі лекары, але і аддушына для адзінокіх людзей. З некаторымі дастаткова пагаварыць і ім становіцца лягчэй без медыкаментаў. Аднак такіх няшмат. Уважліва сочым за сваімі падапечнымі, іншых наведваем абавязкова раз на тыдзень. З Міёрскай раённай бальніцай у нас карпаратыўная сувязь. Калі выклікалі "хуткую" ноччу з райцэнтра, то мне тэлефануюць, надалей мы ўважліва сочым за пацыентам, якому нездаровілася.
Вопытны спецыяліст Тамара Мураўская. Яна лабаранткай на адным месцы з 1977 года. Размеркавалі ў Міёры ў 1975-ым пасля заканчэння Мінскага медвучылішча. Родам з Чэрвеня Мінскай вобласці. Замуж выйшла за новапагосцкага хлопца. Жыве зараз у Шаркаўшчыне, але працоўнаму месцу не здра-дзіла. Тамара Леанідаўна не толькі ў амбулаторыі прымае, але выязджае на ФАПы ў Чапукі, Наўгароды, Волкаўшчыну. У пажылых людзей, якія ўжо не могуць хадзіць, прымае аналізы на даму. Праводзіць неабходныя працэдуры на працоўным месцы ў лабараторыі на цэнтрыфузе, яе "памочнік" і фотакаларыметр. Усе асноўныя аналізы робіць ў амбулаторыі: біяхімію, даследуе кроў і мачу, вызначае білірубін, халестэрын і іншае. Праверка з райцэнтра наведваецца да Тамары Леанідаўны раз у год, працуе яна без парушэнняў санэпідрэжыму.
Каля трох дзясяткаў стажу ў акушэркі Марыны Хахель. Больш за дваццаць год пасля Аршанскага медвучылішча зубным фельдшарам працуе Расціслаў Карабёнак. Практычна столькі ж тут і медсястра агульнай практыкі Наталля Рудзь, а з нядаўняга часу сумяшчае абавязкі прадаўца медыкаментаў у аптэчным пункце.
Медсястра фізіякабінета Жанна Шэбека праводзіць інгаляцыю, промневую тэрапію, ДДТ, пульсатэрапію, электрафарэзы, масаж. Яны найбольш "папулярныя" ў халодную пару. У Наўгародскім ФАПе на выездзе Жанна Аляксееўна робіць масаж, гэта платная паслуга, але попытам карыстаецца.
У амбулаторыі ёсць машына "хуткай". Кіруе ёй ураджэнец Новага Пагоста Віктар Мышкоўскі з 1996 года. На палову стаўкі працуе медсястрой пенсіянерка Тамара Язёнак.
Пад "апекай" амбулаторыі яшчэ тры ФАПы: Волкаўшчынскі, якім загадвае Святлана Сухоўская, Наўгародскі, дзе галоўная Таццяна Пракопчык, і Чапукоўскі, гаспадыня якога Валянціна Пяткевіч.
—Фельчар ідзе на выклік, калі што сур'ёзнае—тэлефануе мне, кладзём пацыента ў бальніцу. Жанчыны—прафесіяналы сваёй справы, таксама працуюць даўно,—так іх характарызуе ўрач Таццяна Іванаўна.
Новапагосцкая амбулаторыя абслугоўвае вялікую частку раёна. Іх падапечныя: Новапагосцкая і Чапукоўская школы і дзіцячыя сады, ААТ "Любінова" і "Наўгароды", восем магазінаў, лясніцтва. У 45 вёсках па дадзеных сельсавета зарэгістраваны 1654 чалавекі, з іх 703 працаздольнага ўзросту, 10 дзяцей да года, 220 да 16-ці. На дыспансерным уліку ў амбулаторыі 682 асобы, толькі па артэрыяльнай гіпертэнзіі 467. Не ўсе пацыенты прыслухоўваюцца да медыкаў і не рэгулярна прымаюць лекі, а таму штогод здараюцца па 5-6 інсультаў. Паводле статыстыкі на ўліку па анкалагічных захворваннях 54 чалавекі, з іх тры выяўлены ў гэтым годзе. Увагі патрабуюць 9 дзяцей-інвалідаў.
Персанал амбулаторыі праводзіць медагляд работнікаў сельгаспрадпрыемстваў, школьнікаў, вялікая ўвага маладому пакаленню, дзеткам да года—яны на асаблівым кантролі, вядуць прыём пацыентаў і выязджаюць на ФАПы.
Дзе цяпер размяшчаецца Новапагосцкая амбулаторыя, яшчэ нядаўна была бальніца. Як ужо згадвалася, будынак узводзіўся пад жыллё для ксяндзоў. Аднак лёс яго быў перайначаны. Старэйшае пакаленне прыгадвала, што пры Польшчы ў амбулаторыі працаваў фельчарам Селівер, два злотыя яму плацілі за прыём. У часы ваеннага ліхалецця, магчыма, гэта быў пункт для хворых.
Марыя Васільеўна Пазняк жыве ў Новым Пагосце, прыйшла працаваць медсястрой у далёкім 1956 го-дзе. Жанчына прыгадвала, што ўжо ў той час у бальніцы дзейнічалі ад-дзяленні: радзільнае, інфекцыйнае і тэрапеўтычнае. Затым набылі яшчэ двухпавярховы будынак. Спачатку там размяшчалася тэрапія, затым прымаў урач, але гэта пазней—у 60-ых.
Працавалі ўрачамі Чыграй і Вальдэмар Іосіфавіч Урублеўскі. Апошнія рамонты, прыблізна ў 90-ых, праводзіў Павел Паўлавіч Чатырбок.
У бальніцы магло размяшчацца 25 хворых. Побач быў агародчык, дзе для харчавання пацыентаў вырошчвалі агародніну. Раскінуўшы галінкі, растуць садовыя дрэўцы. Садзіў і прыбіраў ураджай медперсанал. Былі тут калісьці і сацыяльныя ложкі-месцы, якія асабліва зімой карысталіся попытам. Нават чэргі ўтвараліся. Улетку пажылыя з'язджалі да сваіх хат. Пасля ў падобных установах па прычыне бяспекі па ўсёй рэспубліцы забаранілі даглядаць хворых. Ужо пяць гадоў, як бальніца рэарганізавана ў амбулаторыю.
Загадчыца Таццяна Іванаўна Даргель родам з-пад Даўгаўпілса Латвійскай Рэспублікі. Наш край упершыню наведала ў 1993 годзе, калі знаёмілася з бацькамі нарачонага. Выйшла замуж за хлопца з Волкаўшчыны. Таццяна з Валерыем нарадзілі і выгадавалі дачку і сына. Анастасія жыве ў Мінску, пасля заканчэння БДУ працуе юрыстам на станка-будаўнічым заводзе. Арцём атрымаў вышэйшую адукацыю ў Беларускім дзяржаўным агратэх-нічным універсітэце і ў ААТ "Любінова" загадвае майстэрняй. З маленства прырос да малой радзімы ў Волкаўшчыне, а таму жыве там з бабуляй.
Даргелі маюць дом у Чапуках. Да працоўных месц дабіраюцца на аўтамабілі. Валерый Паўлавіч таксама заняты ў амбулаторыі: зімой дае цяпло, а ўлетку вартуе. Цікава, што ён нарадзіўся ў 1961 годзе ў радзільным аддзяленні, якое дзейнічала на базе Новапагосцкай бальніцы.
Таццяна Іванаўна прыйшла працаваць у Новы Пагост у 1995-ым урачом-педыятрам. Апекавала школьнікаў і дзяцей да года. Да ўчастка тады належылі Наўгароды, Пераброддзе, Стары Пагост, Дубашынскі Двор, Волкаўшчына, Чапукі і іншыя дробныя вёсачкі.
На здымках: 1.Таццяна Даргель; 2.Тамара Мураўская; 3.Таццяна Даргель з Марынай Хахель і Наталляй Рудзь; 4.Расціслаў Карабёнак; 5.Жанна Шэбека; 6.Віктар Мышкоўскі.
Фота К. БЛАЖЭВІЧА.
Вольга ВІШНЕЎСКАЯ.
Похожие статьи
0 комментариев
Добавить комментарий
Комментировать статьи на сайте возможно только в течении 360 дней со дня публикации.