Даверанасць — гэта пісьмовае ўпаўнаважанне, якое выдае адна асоба другой для прадастаўлення перад трэцімі асобамі. Афармляючы яе, вы толькі надзяляеце сваімі правамі іншага чалавека (напрыклад, права валодаць, карыстацца і распараджацца машынай, якая належыць вам на праве ўласнасці; права атрымліваць вашу пенсію і інш.) і толькі на пэўны час (не больш за 3 гады).

Чаму пры пакупцы машыны не рэкамендуецца браць даверанасць ад прадаўца? Па-першае, пры выдачы даверанасці не адбываецца пераход права ўласнасці на аўто. Прадавец як быў яе ўладальнікам, так ім і застаецца. Пакупнік будзе дзейнічаць толькі ад яго імя.

Пасля заканчэння 3-х гадоў даверанасць губляе сваю сілу, вы проста не зможаце ёй распараджацца. Патрэбны страхоўка і тэхагляд, а для гэтага неабходны новы дакумент. А што, калі ўладальнік пераехаў і яго адрас вы не ведаеце? І гэта толькі адна з праблем, з якой вы можаце сутыкнуцца!

А яшчэ адна — даверанасць спыняе сваё дзеянне, калі той, хто яе выдаў, памірае (у нашым выпадку — прадавец). Дакумент аўтаматычна губляе юрыдычную сілу і цяпер нашчадкі прадаўца могуць заявіць пра свае правы на вашу машыну. І гэта будзе законна. Грамадзянін, які выдаў даверанасць, можа ў любы час яе адмяніць.

Але выхад ёсць! Трэба аформіць купленую машыну ў ДАІ, заключыць дагавор куплі-продажу ў натарыўса. Дзяржаўная пошліна пры яго засведчанні складзе 500 тыс. рублёў + 35000 за дадатковыя платныя паслугі. Падарыць машыну блізкаму роднаму (бацькам, дзецям, мужу ці жонцы, роднаму брату або сястры, унукам, дзеду, бабулі, усынавіцелю або ўсыноўленым дзецям) — 200000 рублёў+35000 рублёў за дадатковыя платныя паслугі.

Для параўнання: пры засведчанні даверанасці, якая выдаецца для дзеяння з правам выезду за межы РБ, спаганяецца дзяржпошліна ў 300000 рублёў, без права выезду за межы РБ — 200000 рублёў, калі яна выдаецца блізкаму роднаму — 100000 рублёў + 25000 за дадатковыя платныя паслугі.

Выбар за вамі!

А. БУЛАЎСКАЯ,

дзяржаўны натарыўс.