Праздник деревни прошёл в Казловцах

Праздник деревни прошёл в КазловцахНезвычайнае свята вёскі прайшло ў Казлоўцах. Удзельнікі Папшулёўскага калектыву мастацкай самадзейнасці з'явіліся перад гасцямі мясцовай урачыстасці на веласіпедах. Праз некалькі хвілін на падворку сям'і Маразоў пачаўся канцэрт. 
 
Зараз у Казлоўцах 27 жыхароў разам з дачнікамі. На свята прыйшлі амаль усе вяскоўцы, нават група падтрымкі з аграгарадка Папшулі—тут як тут. Было весела, бо сярод гледачоў нямала дзяцей. Яны з цікавасцю разглядалі выставу пад назвай "Вандроўка ў мінулае роднага куточка", на якой размясціліся рэчы даўніны. 

У пачатку свята для ўсіх гучала песня "Вёсачка мая" у выкананні вакальнай групы. Потым расказалі пра старажылаў. Іван Мышко з жонкай Кацярынай Парфёнаўнай разам больш за паўстагоддзя. Усе нягоды сірочага жыцця выпалі на долю Станіслава Рагавога. Падворак Ніны Пухальскай заўсёды чысты і прыбраны, нягледзячы на ўзрост сваёй гаспадыні. Менавіта для іх удзельнікі вакальнай групы выступілі з песняй "Дарога", а Ніна Сыраватка павесяліла сталых людзей гумарэскай. 

Успомнілі заслужаных пенсіянераў. Ніна Гваздоўская адпрацавала ў калгасе імя Гастэла 45 гадоў бухгалтарам. Ілья Мішута з жонкай Вольгай Латушка працавалі ў жывёлагадоўлі. Галіна і Віктар Каснікоўскія прыехалі ў Казлоўцы 18 гадоў таму. І засталіся тут. Наталля Баслак і Таццяна Мядзелец праспявалі для іх прыпеўкі. Аўтарскія вершы прачытала Вольга Хрол. 
Сям'я Баляслава і Валянціны Маразоў—шматдзетная, моцная і дружная. Гаспадыня пайшла на пенсію, з чым яе і павіншавалі. Наталля і Паліна Баслак выканалі песню "Калечка". 

У гэтым годзе адзначылі сярэбранае вяселле Уладзімір і Наталля Туронкі. Іх сын Ваня— самы малодшы жыхар Казлоўцаў. Спачатку Паліна Баслак праспявала "Мама, я закахалася ў яго", а потым далучылася яе маці Наталля і загучала песня "Смачны мёдзік".
Аляксандра і Таццяну Курахціных таксама ведаюць як добрых і спагадных суседзяў. Арцём Баслак, Юля і Алена Мядзелец праспявалі для іх "Калі з сябрам выйшаў у шлях". 

Валерый Парфяновіч любіць хадзіць па грыбы і рыбачыць. Жыве ў роднай вёсцы Васіль Зелянкевіч. З жонкай Вольгай падтрымліваюць бацькоўскую хату. У іх адрас гучала песня "Тры жаданні" ў выкананні Алены Мядзелец. 
У ААТ "Папшулі" працуюць жыхары Казлоўцаў Уладзімір Аліферка, Валянціна Парэчына, Віктар Шапель, Наталля Максімовіч, Уладзімір Бураўскі, Вольга Чэрап і Аляксей Чэрап. Для працаўнікоў вёскі гучала песня "Час ідзе" у выкананні Паліны Баслак, Веранікі Кадушка, Дашы і Машы Івановых. 

Адзначылі добраўпарадкаванасць дачных участкаў Валянціны і Аліны Ціхановічаў, Аліны Заяц, Васіля і Мікалая Ціхановічаў. Падзякавалі за дагледжаныя двары Івану Мышко, Ніне Гваздоўскай і Ніне Пухальскай. Напрыканцы гучала песня "Пажаданне".
Мы ўдзячныя Баляславу і Валянціне Маразам за гасціннасць і цёплы прыём. 

Наталля БАСЛАК 
і Вольга ХРОЛ.


0 комментариев

Добавить комментарий

Информация
Комментировать статьи на сайте возможно только в течении 360 дней со дня публикации.