Валянціна Апалька з ААТ "Любінова" асвоіла тонкасці догляду цялят

 Даглядчыкі жывёлы ААТ «Любінова» сёлета павялічылі сярэднясутачныя прывагі статка. Прыбаўка яшчэ не тая, якой можна хваліцца. Але пра магчымасці росту сведчыць вынік працы Валянціны АПАЛЬКА з фермы «Галіеўшчына». Яна на групе дарошчвання забяспечыла раённы рэкорд – дзённую прыбаўку ў 883 грамы.

Памяшканне для маладняку прыстасаванае. Цяпер у ім 146 цялят рознага ўзросту. Кантынгент нестабільны: Валянціна Уладзіміраўна прымае двухмесячных цялятак з прафілакторыяў і перадае падрослых на адкорм. Папаўненню патрэбна асаблівая ўвага. Яму даюць заменнік малака, які трэба рыхтаваць двойчы на дні па два літры, падбіраюць найлепшае сена, сочаць, каб пастаянна быў камбікорм КР-2.

Важна, каб маладняк знаходзіўся ў чыстым і сухім асяродку. Таму рабочы дзень у цялятніцы пачынаецца ў 7 гадзін раніцы. Добра, што жыве непадалёку, а яшчэ дапамагае муж Канстанцін, які падвозіць кармы. Для старэйшага пагалоўя патрэбна ўжо не толькі сена, але і сянаж, камбікорм КР-3.

З маладняком Валянціна Апалька працуе з 2008 года, даўно асвоіла ўсе тонкасці догляду цялят. Лічыць, што важна не толькі захоўваць рацыён, але і рабіць усё своечасова, рэгулярна. «Укладваць у справу душу», падказвае галоўны заатэхнік Аляксандр Красько.

На справе гэта азначае, што нельга абмяжоўвацца раздачай кармоў, размеркаваннем ЗЦМ і канцэнтратаў раніцай. Важны знешні выгляд, здароўе, апетыт, стан і настрой жывёл. Можа каму неабходна зёлак адварыць ці ветспецыяліста паклікаць. У абед зноў пацікавіцца кармушкамі – яны не павінны пуставаць – налье вады, падновіць ці заменіць подсціл. Вечарам той жа клопат пра ЗЦМ, кармы, канцэнтраты, умовы адпачынку. І так кожны дзень.

Фота аўтара.
Леанід МАТЭЛЕНАК.