Авторизация
 

У Цвеціне каля двух дзясяткаў сем’яў з малымі дзецьмі

 У Цвеціне каля двух дзясяткаў сем’яў, дзе выхоўваюцца дзеткі дашкольнага ўзросту і вучні-пачаткоўцы. Гэта зусім няшмат, калі прыгадаць 80-90-я гады. І даволі многа для цяперашняга часу.

Працяг жыцця ў мамы на руках
Месцам сустрэчы з матулямі і дзеткамі выбралі Цвецінскі СДК. Установа культуры знаходзіцца ў цэнтры аграгарадка, усім дайсці зручна. Побач магазін, можна па дарозе за пакупкамі завітаць. У летнюю пару ў вёсцы няма калі марнаваць час. Шмат спраў на агародзе, у садзе, на кухні. Хоць некаторыя маладыя маці выглядаюць нібы дзяўчаты-падлеткі, з клопатамі спраўляюцца не горш за гаспадынь са стажам.
— Агарод пасадзілі, памідоры ў цяпліцы вырошчваем, гаспадарку невялікую трымаем, — гаворыць Таццяна Парадня.


У Цвеціне Таццяна жыве другі год. Родам з вёскі Папшулі, што таксама ў Завуццеўскім сельсавеце. Па размеркаванні працавала бухгалтарам у Пастаўскім раёне. Цяпер у водпуску па доглядзе за дзіцём. На руках у матулі гадавалы сынок Арцём з апетытам смокча з бутэлечкі малако. Муж Іван заняты ва УП “Цітова”. Ад гаспадаркі маладая сям’я атрымала жыллё.


У спадчыну застаўся бабулін дом Яўгену і Дзіне Валынцам. Год таму ў маладой сям’і нарадзілася дачушка Насця.
— Дзяўчынка спакойная, асабліва не капрызнічае. Паспяваю справіцца і дома, і ў агародзе, і вячэру мужу прыгатаваць, — расказвае Дзіна. — Я з Шаркаўшчыны. Па прафесіі повар. У Цвеціна прыехала два гады таму на працу. Тут з Жэнем пазнаёміліся, ён мясцовы. Працуе ў Дзісенскім лясгасе.


 Гушкае дачушку Машу, якой напрыканцы верасня споўніцца годзік, Ірына Дуброўская. Дзяўчынка засынае пад гаворку.
— Старэйшы сын Мікіта зараз у дзіцячым садку. У наступным годзе пойдзем у першы клас, — гаворыць Ірына. — Я сама родам з Цвеціна. Цяпер тут мае дзеці падрастаюць. Жывём у бацькоўскім доме. Даглядаць маленькіх дапамагае маці.


У сям’і Арцёма і Дзіяны Казачонкаў падрастаюць дзве дачушкі. Старэйшай Сафіі пяць год, Злаце хутка два споўніцца.
— Самі не мясцовыя, але ўжо тры гады тут жывём, — кажа Дзіяна. — Жыллё ў нас службовае. Муж — участковы інспектар міліцыі. Я пакуль займаюся дзецьмі і хатнімі справамі. Большую частку часу дома, да сяброўкі заходжу, якая жыве па-суседстве.


Засталіся ў родных мясцінах Віктар і Святлана Лінкевічы. Малая радзіма Віктара — суседняе Язна. Святлана вырасла ў Цвеціне. Яны разам семнаццаць год. Старэйшы сын Дзяніс сёлета скончыў школу, дачушка Насця пойдзе ў шосты клас.


— Дзеці вучацца ў Язне, туды аўтобус возіць, — заўважае Святлана. — Шкада, што зачынілі нашу школу. Ужо год яна пустуе.
У мамы на руках ціха пасопвае трохмесячная Сонечка. Дзе будзе вучыцца яна?


Лепшая дарога — да бацькоўскага парога
Частыя госці на малой радзіме цяперашнія палачанкі Марына Барысёнак і Анастасія Бузіцкая. Абедзве выраслі ў Цвеціне, вучыліся ў мясцовай школе. Марына пэўны час працавала выхавальнікам у дзіцячым садку, вадзіла сюды старэйшую дачушку. Калі ў мужа з’явілася работа ў Полацку, пераехалі.


— У Цвеціна прыязджаем ледзь не кожныя выхадныя. Водпускі тут праводзім. Нашы дачушкі Яна і Юля з задавальненнем у вёсцы бавяць час. Нядаўна трэба было па справах на некалькі дзён у горад адлучыцца, дзяўчаты нават плакалі, так хацелі хутчэй вярнуцца.
Анастасія Бузіцкая выхоўвае дачушку Юлю, якой ідзе трэці год, і на палову стаўкі працуе ў Цвецінскім СДК. Дабрацца з Полацка — не праблема. І маленькая дзяўчынка заўсёды з радасцю едзе да дзядулі і бабулі. Тут прасторна, весела, цікава.


Праводзіць канікулы ў дзядуль і бабуль чатырнаццацігадовая Паліна Ганебная разам з малодшымі сястрой і брацікам.
— У мяне тут ёсць сябры, з якімі адпачываем. Ходзім на рачулку купацца, гуляем на школьным стадыёне. Разам весела. Мне падабаецца ў вёсцы. Аднак у горадзе больш магчымасцей для самаразвіцця.

 Пра трывогі і задумкі
Па словах маладых матуль, якія пражываюць у Цвеціне пастаянна, мяняць месца жыхарства не плануюць. Сельскі ўклад з гаспадарчымі клопатамі і без залішняй мітусні для большасці з іх звыклы. Дзеці дыхаюць чыстым паветрам. На стале — натуральныя прадукты з уласнага агарода. Сацыяльная інфраструктура ў параўнанні з горадам сціплая, аднак пэўныя патрэбы можна задаволіць. Дзейнічаюць магазін, пошта, бібліятэка, Дом культуры. Культработнікі запрашаюць на святы. У Дзень сям’і ла-дзілі “Матуліны пасядзелкі”, падрыхтавалі вясёлую праграму на Купалле.


Разам з тым пра будучыню аграгарадка маладыя сяльчанкі непакояцца.


— Для нас было нечаканасцю закрыццё школы. Хоць бы цяпер без пошты і магазіна не застацца, — дзеляцца сваімі трывогамі. — Ля школьнага будынка засталася гульнёвая пляцоўка. Там арэлі, горкі, турнікі. Аднак на тэрыторыі хутка расце трава. Вось бы гэтую пляцоўку перанесці да клуба. Ёсць дзе размясціць. Для дзяцей гэта было б месцам забаў, для матуль — сустрэч і адпачынку. Звычайна малыя ў сваіх дварах забаўляюцца і маці за клопатамі адна з адной рэдка бачацца.


З просьбай абсталяваць дзіцячую пляцоўку ў цэнтры аграгарадка цвецінцы звярталіся да дэпутата Палаты прадстаўнікоў Нацыянальнага сходу Рэспублікі Беларусь Андрэя Юніцына. Паабяцаў трымаць пытанне пад увагай. Матулі спадзяюцца, што пляцоўка атрымае новы адрас, разлічваюць на падтрымку і дапамогу мясцовага кіраўніцтва. 

ДЛЯ РАЗВАГІ:
Не спяшайцеся сцвярджаць, што ў горадзе жыць лепш, чым у вёсцы. І наадварот. Усё неадназначна. Адным камфортна сярод гарадскіх шуму і мітусні. Іншыя выбіраюць вясковую ціш і прыволле. Каму прасцей? І ў адных, і ў другіх свае радасці і клопаты. Разам з тым дзіцячы смех на вясковай вуліцы — цяпер асаблівая каштоўнасць. І важна гэта зберагчы. 

Фотаматэрыял Казіміра БЛАЖЭВІЧА.

Кацярына РЫНКЕВІЧ.

рейтинг: 
Пакінуць каментар
иконка
Каментаваць артыкулы на нашым сайце магчыма толькі ў плыні 360 дзён з дня публікацыі.
Мы ў сацыяльных сетках

  • да 2018
  • 2019
  • Камэнтуюць
  • Актуальна
  • Чытанае

Рэцыдыў

  • 09 ноябрь 2010, 11:17
  • 98 168
  • 0

Інвестыцыйны форум

  • 23 сентябрь 2011, 10:05
  • 85 504
  • 1

Злавілі рыбку, ды… залатую

  • 28 февраль 2011, 16:16
  • 79 850
  • 0

Пераброддзе 2012. Погляд вучонага

  • 31 август 2012, 15:19
  • 42 332
  • 0

  • 11 февраль 2011, 11:20
  • 41 085
  • 0

Кандыдатамі жадаюць стаць

  • 21 август 2012, 15:30
  • 36 434
  • 0

Вагон "вярнуўся"

  • 11 июнь 2013, 10:04
  • 0
  • 2

Пра тых, хто акты рэгіструе

  • 19 декабрь 2012, 09:24
  • 0
  • 2

Трагічны люты

  • 01 март 2011, 09:00
  • 25 579
  • 2
Курс валют у Міёрах
Святы
Праздники БеларусиБлижайшие праздники Беларуси

Православные праздникиБлижайшие православные праздники

Католические праздникиБлижайшие католические праздники

Именины 6 апреля 2020
Владимир, Захар, Мартин, Петр, Степан, Яков

Именины 5 апреля 2020
Алексей, Василий, Георгий, Илья, Макар, Сергей, Анастасия, Варвара, Лидия, Пелагея

Госці краін

free counters
Партнеры сайта