Міярчанін Сяргей Радзішэвіч сёлета скончыў Віцебскае вучылішча алімпійскага рэзерву і застаўся ва ўстанове атрымліваць сярэднюю спецыяльную адукацыю. Намераны стаць трэнерам па лёгкай атлетыцы.

Са спортам Сяргей пасябраваў яшчэ вучнем-пачаткоўцам. Памятае, як учацвёртым класе стаў першым на раённых спаборніцтвах па лёгкай атлетыцы.

– Гэта было так нечакана і вельмі радасна. Я і раней у спаборніцтвах удзельнічаў, але месцы не займаў. А тут – перамога, – успамінае суразмоўнік.

Пасля смак перамогі адчуваў не раз. Займацца лёгкай атлетыкай і паспяхова выступаць на спаборніцтвах прадоўжыў у Віцебскім кадэцкім вучылішчы, куды паступіў пасля сёмага класа.

– Правучыўся адзін год і забраў дакументы. Не маё, – расказвае юнак. – Прынялі ў вучылішча алімпійскага рэзерву. Складана было сумяшчаць вучобу са штодзённымі трэніроўкамі, паспяховасць знізілася ў параўнанні са школай, аднак мне тут падабалася. За тры гады навучання пабываў на спаборніцтвах ва ўсіх абласных цэнтрах, акрамя Гродна, а таксама ў Маскве. На рэспубліцы заўсёды ўваходзіў у тройку лідараў у асабістым заліку. Выступаю за зборную Беларусі на міжнародных спаборніцтвах.

Канёк Сяргея Радзішэвіча – скачкі з разбегу ў даўжыню. На зімовай матчавай сустрэчы Беларусі і Расіі ўпершыню дасягнуў выніку ў 7,07 метра і стаў другім. Таксама бегае эстафеты.

Чарговы сезон завяршыўся ў канцы ліпеня матчавай сустрэчай Беларусі і Расіі, што праходзіла ў Мінску. Сваім вынікам Сяргей не вельмі задаволены.

– Рана пачаў рыхтавацца, форму страціў, – заўважае. – Не скажу, што я вельмі патрабавальны да сябе. Аднак імкнуся да найлепшых вынікаў.

Вольны ад вучобы і спаборніцтваў апошні месяц лета Сяргей правёў з карысцю. Паспеў падзарабіць, працуючы дзі-джэем у лагеры, пагуляць у футбол з сябрамі, адпачыць і набрацца сіл перад навучальным годам, які сустрэне ў новым статусе.

– Спорт – маё адзінае сур’ёзнае захапленне, якое намераны зрабіць прафесіяй. Родныя мяне ў гэтым падтрымліваюць, – адзначае малады чалавек.

Кацярына Рынкевіч.
Фота з альбома Сяргея РАДЗІШЭВІЧА.