Настаўнікам фізічнага выхавання ў Туркоўскай СШ працуе Андрэй Яўгенавіч Лапіцкі. Поспехамі радуюць яго вучні. Вось некаторыя з лепшых спартсменаў. 

Віталь Лагун, адзінаццацікласнік, у школу яму дабірацца тры кіламетры ад Цімошкава, але такая адлегласць прывычная і яго не пужае. Хлопец заўсёды ахвотна ўдзельнічае ў раённых спаборніцтвах па лёгкай атлетыцы, дзе мае асабістыя ўзнагароды, а ў складзе зборнай заваёўваў кубак у лыжных гонках. У вольны час займаецца гіравым спортам. Аднак не чужы яму футбол, падабаецца і валейбол — тым больш што па росце выдатна падыходзіць — удзельнічае ў складзе зборнай у турнірах, што праводзяцца з камандай з Дзісны.

Сяргей Алеська, 9 клас. Настаўнікі раяць іншым вучням павучыцца ў яго дысцыплінаванасці.  Дарэчы, гэтую рысу ён развівае самастойна. Наведвае секцыю па кіокушынкай каратэ до ў ДЮСШ. У складзе каманды займаў другое месца на спаборніцтве па тэхніцы ў Верхнядзвінску. На трэніроўкі дабіраецца на аўтобусе ці тата падвозіць, які шчыра падтрымлівае захапленне сына. Сяргей удзельнічае ў лыжных гонках. Выдзяляецца ён і "залатымі рукамі", на раённай алімпіядзе па працоўным навучанні заваяваў дыплом першай ступені! Увогуле, хлопец з'яўляецца ўзорам работы над сабой для сваіх аднагодкаў.

Ілона Паўлоўская — васьмікласніца, на раённых спаборніцтвах па лёгкай атлетыцы займала першыя, другія і трэція месцы. У мінулым годзе на абласных спаборніцтвах па лёгкай атлетыцы яна ў забегу фінішыравала чацвёртай, а гэта хоць і не прызавы, але дастаткова высокі паказчык. Дзяўчына добра валодае пэндзлікам: на конкурсе, прысвечаным ваеннай тэматыцы, у раёне заняла другое месца, удзельнічала ў конкурсе малюнкаў па правілах бяспекі.

Вольга ВІШНЕЎСКАЯ.