Больш за тысячу ўдзельнікаў і гасцей з Беларусі і Расіі сабраў напрыканцы верасня ў Віцебску першы Саюзны злёт грамадзян старэйшага пакалення «Мы – за актыўнае даўгалецце». Прысутнічалі дэлегацыі з усёй рэспублікі, тэматычныя пляцоўкі прадставілі тэрытарыяльныя цэнтры. Міярчане нагадалі пра бяспеку праз спецыяльныя кейсы, здзівілі брэндавай прадукцыяй, зарадзілі пазітывам на танцавальным інтэрактыве.

 Да танцавальнага інтэрактыву ўдзельнікі гурта «Нясумны ўзрост» аддзялення дзённага знаходжання для пажылых людзей ТЦСАН рыхтаваліся паўтара тыдня. Вызначыліся з падборам танцаў, на рэпетыцыях адпрацоўвалі зладжанасць рухаў.

– Удзельнікі і госці свята міма не праходзілі. Танцавалі з намі, – заўважаюць. 

Зараджалі пазітывам іншых і самі акунуліся ў святочную атмасферу.

– Уразіў маштаб мерапрыемства, – заўважае Ніна Федуковіч. – Шмат цікавага пабачылі на пляцоўках. Напрыклад, госці з Калінінградскай вобласці прадставілі дэкаратыўнага шчупака з бурштыну. У татар прадэгуставалі чак-чак.

– Атмасфера вясёлая, радасная, – дадае Галіна Конанава. – Усе ідуць на кантакт: рускія, татары, казахі… Разам спявалі, карагоды вадзілі. Словам, актыўнічалі.

– А шэсце якое прыгожае, пампезнае. Аркестр іграў, – захапляецца Ала Лагун. – Як заўважалі госці з Расіі, гэтае відовішча іх вельмі ўразіла.

Удел у злёце пакінуў у міярчан выключна яркія і пазітыўныя эмоцыі. Згодны з тым, што такія мерапрыемствы зараджаюць бадзёрасцю і нагадваюць, што ўзрост 60+ – залатая пара для актыўнасцей і самарэалізацыі.

У бліжэйшых планах актывістаў аддзялення дзённага знаходжання для грамадзян пажылога ўзросту ТЦСАН удзел у міжрэгіянальным фестывалі творчасці «Я магу!», што пройдзе 7 кастрычніка ў Докшыцах. Рыхтуюць канцэртную праграму.

 Кацярына РЫНКЕВІЧ.
Фота з альбома аддзялення ТЦСАН.