У Міёрскім гісторыка-этнаграфічным музеі дзейнічае выстава ікон мастачкі з Маладзечна Ядвігі СЯНЬКО.  “Святло нязгаснае”. Такая назва аб’ядноўвае прадстаўленыя праваслаўныя і каталіцкія іконы, вядомыя біблейскія сюжэты. Пра аўтара расказвае дырэктар музея Аксана Лагунёнак.

 — У нашым музеі мастачка не ўпершыню выстаўляе свае работы. Спадзяёмся, што і на гэты раз яны будуць цікавыя для міярчан і гасцей горада, -- гаворыць Аксана Анатольеўна. – У 1983 годзе Ядвіга Сянько скончыла факультэт выяўленчага мастацтва Маскоўскага ўніверсітэта мастацтваў. з 1997-га яе творчасць непарыўна звязана з хрысціянскай тэматыкай. Атрымала блаславенне Філарэта мітрапаліта Мінскага і Слуцкага Экзарха ўсёй Беларусі на напісанне спісаў з усіх вядомых у праваслаўным свеце ікон. У творчай скарбонцы – звыш двух тысяч работ. Размешчаны яны як у храмах Маладзечна і Маладзечненскага раёна, так і ў іншых святынях краіны. Ёсць работы беларускай мастачкі ў прыватных калекцыях у Расіі, Украіне, Арменіі, Польшчы, Германіі, Францыі, Бельгіі, Італіі, Англіі, ЗША. З 2003 года ў гарадах Беларусі прайшло каля двухсот выстаў. Ядвіга Сянько ўдастоена звання сапраўднага члена Міжнароднай Акадэміі экалогіі, мастацтва і архітэктуры.
У МУЗЕІ прыхільнікі мастацтва бліжэй пазнаёмяцца з творчасцю Ядвігі Сянько. Даведаюцца пра гісторыю і прызначэнне адлюстраваных ікон.

Працуе выстава да 28 верасня. За даведкамі можна звярнуцца па тэлефоне 4 19 15. 

Фота аўтара.

Кацярына РЫНКЕВІЧ.