Дата 23 верасня 2023 года стала асаблівай для міярчан Дзмітрыя БАЙЧУКА і Святланы КРУК. У гэты дзень нарадзілася іх сям’я.

Дзень нараджэння сям’і Дзмітрыя і Святланы Байчукоў – адна са старонак сёлетняга экасвята «Жураўлі і журавіны Міёрскага краю». Як заўважыла начальнік аддзела загса Ірына Юхно, журавель абяцае шчасце, здароўе і дабрабыт, а жураўліная пара – на ўсё жыццё.

Гучыць марш Мендэльсона, з радасным хваляваннем захо-   дзяць у залу ўрачыстых рэгістрацый жаніх і нявеста. Ступаюць на ручнік, каб, згодна з народнай прыкметай, усё жыццё кахаць адно аднаго і жыць у згодзе. Яшчэ адзін прыгожы і кранальны абрад – запальванне сімвалічнага сямейнага ачага, у чым Дзмітрыю і Святлане дапамагаюць іх бацькі.

Пастаўлены подпісы ў запісе акта аб рэгістрацыі шлюбу, маладыя абмяняліся пярсцёнкамі. Спяшаюцца з віншаваннямі родныя, блізкія і сябры.

Павіншаваць маладую сямейную пару прыйшлі намеснік старшыні райвыканкама Аляксандр Жук, начальнік аддзела па адукацыі Уладзіслаў Кашкур, старшыня раённай арганізацыі Беларускага прафсаюза работнікаў адукацыі і навукі Юлія Ліманоўская. Пажаданні самыя шчырыя – кахання, даверу, узаемаразумення, трывалага сямейнага саюзу.

Гісторыя Дзмітрыя і Святланы Байчукоў пачалася два гады таму. Выпадковае знаёмства ў сацсетцы перарасло ў сур’ёзныя адносіны. Дзяўчына дачакалася каханага з арміі. Цяпер разам працуюць у СШ № 2 імя

М. Ізварына. Дзмітрый вядзе ўрокі фізічнай культуры, Святлана – педагог-арганізатар. Сваю будучыню ураджэнец аграгарадка Чапукі і міярчанка звязваюць з родным райцэнтрам, дзе абодвум камфортна і ўтульна.