Сакавіцкая сустрэча клубаў «Сярэбраны ўзрост» ТЦСАН і «Суседачкі» з Чэрасаў атрымалася па-вясенняму яркай, сонечнай, творчай. У праграме – дэфіле і майстар-клас па вырабе ўпрыгожванняў.
Аддзяленне дзённага знаходжання для грамадзян пажылога ўзросту ТЦСАН наведваюць шмат умеліц. У іх ліку Ніна Іванаўна Ігошына. Колькасць створаных ёй вязаных рэчаў – ад шаляў да сукенак – вымяраецца дзясяткамі. Вырабы майстрыцы прадэманстравалі сяброўкі. Модны паказ прайшоў на «ўра».
– Наш першы вопыт дэфіле мае поспех, – заўважае загадчык аддзялення Ганна Ліскова. – Заняткі школы мадэлінгу ў ліку рэкамендацый Нацыянальнай стратэгіі «Актыўнае даўгалецце - 2030». Будзем далей практыкаваць модныя паказы. Да таго ж нашым дзяўчатам ёсць што паказаць.
Захоплена майстравалі ўдзельніцы сустрэчы ўпрыгожванні з гальштукаў пад кіраўніцтвам спецыяліста па сацыяльнай рабоце Міраславы Плотнікавай.
Для сябровак з чэраскага клуба «Суседачкі» міярчанкі загадзя падрыхтавалі вясеннія падарункі. Госці таксама прыехалі з сувенірамі ручной работы для клуба «Сярэбраны ўзрост». .
