У абласных конкурсах «Дажыначны каравай» і «Дажыначны сноп» Міёрскі раён у ліку пераможцаў. Караваю прысудзілі першае месца, сноп на трэцяй пазіцыі.

 Аўтар абедзвюх работ – кіраўнік клуба народных майстроў «Святліца» Алена Батарчук.

– Цікава ўкладваць у рэчы пэўны сэнс. Перш чым прыступіць да работы, чытала, як раней дажынкі адзначалі. Падчас вывучэння народных традыцый і абрадаў прыходзяць творчыя ідэі, – расказвае майстрыца.

  Каржы для каравая выпякалі на міёрскім хлебазаводзе. Дапамаглі з салёным цестам, з якога Алена ляпіла дэкор. Упрыгожыла каравай каласкамі, узорамі беларускага арнамента. Птушка з каласком у дзюбе азначае, што ўраджай убраны да апошняга каласка. На верхнім каржы – выявы гаспадара і гаспадыні, якія трымаюць у руках калач з мукі новага ўраджаю.

 Свая сімволіка ў жытнёвага снапа, аздобленага жывымі кветкамі. Сплеценае на вярхушцы сонца з саломенных жгуцікаў – гэта кругазварот земляробчага календара, адзіночныя каласкі ўнізе – прадвеснікі новага ўраджаю.

На свята «Дажынак» кожны раён рыхтаваў каравай і сноп, міёрскія аказаліся ў ліку найлепшых.

Фотаматэрыял Алены БАТАРЧУК.

Кацярына РЫНКЕВІЧ.