Калі едзеш з Міёр у бок Полацка, сустракаеш вёску Шарагі. У яе назве прасочваецца "фамільны" след. Найбольш верагодна, што "Шарагі" пайшлі ад прозвішча Шараг, даволі распаўсюджанага на тэрыторыі раёна. Яно паказвае на заснавальніка роду, утворана ад аналагічнага імені. Ідышскае імя Шраг (Шрага, Шраге) азначае "свечка, полымя".

Магчыма таксама, што прозвішча Шараг утворана ад сугучнай мянушкі. Этымалагічна звязана з "Шарак", што ў перакладзе з беларускай мовы азначае "кафтан з шэрага сукна". Так маглі называць таго, хто насіў шэрую вопратку. Магчыма, што мянушка Шараг паходзіць ад "шараг" — "крыўляка, ламака, курчыла, дзяргун". Так звалі няўрымслівае, непаслухмянае дзіця.

Гэта толькі некалькі варыянтаў паходжання самога прозвішча. Тут выяўляюцца яўрэйскія і беларускія карані, што невыпадкова. Яшчэ да пачатку Вялікай Айчыннай вайны вялікую частку насельніцтва гарадоў і бліжэйшых да іх вёсак складалі яўрэі. А Шарагі размешчаны за некалькі кіламетраў ад у мінулым буйнога павятовага цэнтра — Дзісны. Прозвішчам Шараг там нельга было нікога здзівіць.
Зараз Шарагі — невялікая вёска. Жыццё тут працякае памерана і павольна.

Хацелася б, каб кожны жыхар раёна ведаў гісторыю свайго краю. Спазнавайце новае, здзіўляйцеся разам з намі.

Дзмітрый ВАСІЛЕНКА.