Чытачы ведаюць пра знакаміты род Лапацінскіх, радавое гняздо якіх знаходзілася ў Лявонпалі. 22 чэрвеня яго наведала Данута Лапацінская, якая разам з сяброўкай Рабертай Лістэр прыехала з Англіі.

Па словах старэйшыны вёскі Лявонпаль Марыі Вацлаваўны Шук, Данута —другая жонка Станіслава Лапацінскага. Жанчыне ўжо 93 гады, але яна вельмі хацела пабачыць мястэчка, пахадзіць па сцежках парку, памыць твар у вадзіцы Заходняй Дзвіны. Сама Данута выйшла замуж за Станіслава за мяжой, у Лявонпалі не жыла, але многае ведае са слоў мужа. З сабой прывезла старыя фотаздымкі. Гледзячы на іх, адшуквала тыя мясціны, якія занатаваны на фота. Вельмі здзівілася, што будынак захаваўся і дзейнічае касцёл. У яе ўяўленні на гэтым месцы павінны быць разваліны. З замежнай госцяй размаўляла карэнная жыхарка Лявонпаля Яніна Васільеўна Амяльчонак.

— Мне было тады гадоў 13, — распавядала жанчына. — У памяці захавалася многае з побыту, жыцця вяскоўцаў.

Пра ўсё яна расказвала прыезджай пані.

Ванда Лапацінская размаўляе на польскай і англійскай мовах. Добра, што Марыя Вацлаваўна нядрэнна ведае польскую, а таму зносіны былі без перакладчыка. За кубачкам кавы ў доме старэйшыны размова працягвалася. Нягледзячы на паважыны ўзрост, Данута пераадолела няблізкі шлях. У Мінск прыляцела на самалёце, а са сталіцы з дапамогай супрацоўнікаў турыстычнай фірмы прыехала ў Міёры, дзе начавала. Яе ўразілі беларускія краявіды, гасціннасць тутэйшых людзей. На развітанне гаварыла, што пастараецца падтрымліваць сувязь з вяскоўцамі, ды і інтэрнэт дапаможа.

Л. НАВАСЕЛЬСКІ.