Старшынёй Дзісненскага гарвыканкама з 20 жніўня працуе Дзяніс Леановіч.

Нарадзіўся Дзяніс Сцяпанавіч у студзені 1984 года ў Дзісне. Выпускнік Дзісненскай СШ па прыкладзе бацькі выбраў лясную гаспадарку, якой прысвяціў амаль дваццаць гадоў. Пасля заканчэння Беларускага дзяржаўнага тэхналагічнага ўніверсітэта пачынаў інжынерам па ахове працы ў Дзісненскім лясгасе, дзе ў наступным працаваў на розных пасадах. Быў невялікі перарыў, калі спрабаваў сябе ў іншых сферах – нафтаперапрацоўцы і металаапрацоўцы – але вярнуўся, бо прырода аказалася бліжэй.

З 2017-га – галоўны ляснічы, а ў 2020-м узначаліў Дзісненскі лясгас. З 2023-га да нядаўняга часу працаваў ляснічым у Дзісненскім лясніцтве.

У планах новага кіраўніка – служыць сваёй малой Радзіме, працаваць на дабрабыт рэгіёна і краіны. Развіваць брэнд Дзісны як самага маленькага горада Беларусі, абапіраючыся на яго традыцыі і набыткі, а таксама турызм, прыцягваць інвестараў, акцэнтуючы ўвагу на багатыя гісторыю і традыцыі Дзісны.

– У Год добраўпарадкавання і пяцігодку якасці важна навесці ідэальны парадак у Дзісне. Каб горад слыў не толькі самым маленькім, але і самым дагледжаным. Для гэтага неабавязковы вялікія фінансавыя сродкі – дастаткова жадання гараджан. Тэрыторыя клопату пра Радзіму не заканчваецца агароджай вашага двара. Мы нарадзіліся на гэтай зямлі, тут выраслі, тут жывуць нашы бацькі, дзеці, унукі. Навядзенне парадку ў грамадскіх месцах – справа не толькі дзяржавы, але і кожнага мясцовага жыхара, – упэўнены Дзяніс Сцяпанавіч.

Жанаты, разам з жонкай выхоўваюць дваіх дзяцей.