Свята вёскі адбылося ў Паташні ў канцы жніўня. Тры гады таму яно пачыналася як сціплая ініцыятыва, а цяпер стала падзеяй, якая аб’ядноўвае тых, хто тут нарадзіўся, вырас і жыве.

– Ідэя была простай: сабраць людзей, – распавядае старэйшына Валерый Блажэвіч. – Ні школы, ні клуба ўжо няма, а людзям трэба месца, дзе можна сустрэцца, пагаварыць, успомніць. Першы год прыйшло каля 80 чалавек, у мінулым – ужо 150, а сёлета больш за 200. Едуць тыя, хто тут жыў, хто родам адсюль. Прыязджаюць з дзецьмі, з унукамі – перадаюць традыцыю.

Падрыхтоўка да свята пачалася за тыдзень: Валерый Блажэвіч пабудаваў новы масток, пакасіў траву, упрыгожыў пляцоўку.

Асаблівую ўвагу на свяце надалі працы і творчаму падыходу жыхароў Паташні і суседніх вёсак. За добраўпарадкаванне ўчасткаў узнагароджаны Павел і Антаніна Кашкуры, Сяргей і Ала Панізнікі, Алег і Валянціна Такмаковы – людзі, якія сваім прыкладам натхняюць суседзяў.

Канцэртную праграму прадставілі вясёлыя вядучыя Ірына Лаўрыновіч і Валянціна Ляшкевіч, артысты аўтаклуба Міёрскага цэнтра культуры і народнай творчасці. Гледачоў радавалі ансамбль «Родныя галасы», Святлана Ішчук, Ганна Мацукова, Дар'я Каралькова, Ягор Абалевіч, Лада Сушко і Мікіта Дабравольскі. У арганізацыі свята ўдзельнічалі Дар'я Мілашэвіч і Святлана Рачыцкая, дзякуючы намаганням якіх усё прайшло на высокім узроўні.

Калі пачаліся танцы, да свята далучылася моладзь з Міёр. Песні, карагоды, смех дзяцей і размовы старажылаў – усё гэта стварыла атмасферу ўтульнасці і яднання.

– Ніхто не хацеў разыходзіцца, – усміхаецца Валерый Іванавіч. – Пакуль не сцямнела – спявалі, танцавалі, размаўлялі. Гэта не проста свята – гэта вяртанне да сябе, да сваіх родных.