Узяць палітру і выціснуць на яе самыя сакавітыя фарбы, дадаць усмешкі гледачоў і захапленне дзяцей, прыправіць бімолямі і дыезамі, дасканала перамяшаць. Такі рэцэпт дня прапанавалі работнікам культуры Міёршчыны падчас урачыстасці, прысвечанай іх прафесійнаму святу. 

Культура – неад’емны спадарожнік цывілізацыі. Чалавек заўсёды адчувае патрэбу ў мастацтве і менавіта яно – музыка, жывапіс, архітэктура… – робіць людзей людзьмі, заўважыў старшыня раённага Савета дэпутатаў Валерый Драба. Пажадаў работнікам культуры раёна запальваць новыя зоркі і ўручыў узнагароды.  

Ганаровай граматай упраўлення культуры аблвыканкама адзначаны бібліятэкары Чэраскай і Павяцкай бібліятэк Валянціна Пальчэўская і Таццяна Мутар, настаўнік дзісненскага філіяла дзіцячай школы мастацтваў Валянціна Кавалеўская, загадчык аддзела бібліятэчнага маркетынгу Міёрскай цэнтральнай бібліятэкі Вольга Корсак. Ганаровай граматай райвыканкама ўзнагароджана рэжысёр народнага тэатра ЦКіНТ Святлана Рачыцкая. Падзяка старшыні райвыканкама аб’яўлена настаўніку дзіцячай школы мастацтваў Сяргею Матэленку і загадчыку Дзісненскага гарадскога Дома рамёстваў Ірыне Ядрэўскай. Ганаровай граматай раённага Савета дэпутатаў адзначана рэжысёр Чэраскага СДК Надзея Федуковіч. 
Падарунак для калег падрыхтавалі педагогі дзіцячай школы мастацтваў і іх выхаванцы. Святочны канцэрт падарыў шмат прыемных эмоцый.  

Кацярына РЫНКЕВІЧ.