Міністэрства прыродных рэсурсаў і аховы навакольнага асяроддзя распачынае падрыхтоўку да чарговага міжнароднага воднага форуму «Крыніцы Беларусі». 

Мерапрыемства запланавана на пачатак лістапада. Адзін з этапаў яго рэалізацыі – інфармацыйная кампанія «Раскажы пра сваю крыніцу». Хаця з поўным правам яе можна назваць акцыяй, бо размова ідзе не проста пра арганізацыю масавага наведвання гэтых прыродных помнікаў дзецьмі, моладдзю і дарослымі, а пра працяг раней аб’яўленай важнай справы «Уладкуем малую радзіму». Таму і цяпер галоўнае – навядзенне парадку ля крыніц – гэтых маленькіх дзівосаў, што падарыла нам прырода.

Міёршчына імі не абдзелена. Самыя знакамітыя – крыніца святога Яна на Язненшчыне (на фота), Святая вада ў Новапагосцкім сельсавеце, ля вёскі Дзедзіна ў Перабродскім. Дзякуючы намаганням грамадскасці і мясцовых органаў улады, працоўных калектываў яны добраўпарадкаваны, хаця працэс уладкавання бясконцы. Яго варта прадоўжыць. А колькі забытых, як, напрыклад, крыніца настаўніка-патрыёта Фрола Манцэвіча на Волце, іншых маленькіх, непрыкметных.

Крыніцы цяпер рэдка выкарыстоўваюцца для забеспячэння насельніцтва чыстай вадой. Але яны заўсёды – цуд прыроды, помнік для пакланення, нагода спыніцца дзеля глытка асвяжальнай вільгаці. Таму заклік расказаць пра сваю крынічку – гэта зварот да кожнага чалавека пазнаёміць шырокую грамадскасць з кожным прыродным дзівам, добраўпарадкаваць яго. Няхай самы маленькі чысцюткі струменьчык з нетраў матухны-зямлі радуе не толькі свежасцю, але і прыгажосцю.
Раскажы пра сваю крынічку ў раённай газеце.

Фота з архіва рэдакцыі.
Іван РУНДО, начальнік раённай інспекцыі прыродных рэсурсаў і аховы навакольнага асяроддзя.