Як і большасць наведвальнікаў аддзялення, Ірына Аляксандраўна Грыцаенка заўважае, што ў першую чаргу прыходзіць сюды за стасункамі. Рада сустрэчам з сяброўкамі, спрабуе новыя для сябе заняткі, з цікавасцю ўдзельнічае ў мерапрыемствах.
Да інтэрв’ю Ірына Аляксандраўна з дапамогай супрацоўнікаў і сябровак з аддзялення падрыхтавала адметны фон. Сустрэчу ўпрыгожылі яе вязаныя рэчы, яркія коўдры ў тэхніцы лапікавага шыцця, калекцыі невялікіх вазачак і фігурак – сімвалаў года. Яшчэ адну калекцыю з сабой не ўзяла. Са школьных гадоў збірае маркі. Акрамя калекцыяніравання і вязання, чытае гістарычныя раманы, вырошчвае ўзумбарскую фіялку, займаецца аквааэробікай у фізкультурна-аздараўленчым комплексе.
У аддзяленне для пажылых грамадзян Ірыну Аляксандраўну прывяло жаданне асвоіць ноўтбук. Запісалася на курсы камп’ютарнай граматнасці ў сацыяльнае кафэ «Сярэбраны ўзрост», што пачало дзейнічаць напрыканцы 2020 года. Наноў адкрыла для сябе аддзяленне ў 2025-м.
– Прыйшла і здзівілася, колькі тут гурткоў: і пляценне з газетных трубачак, і джутавая філігрань, і вязанне кручком, – гаворыць суразмоўніца. – Сама я спіцамі вяжу, яшчэ ў студэнцтве навучылася. У аддзяленні пачала займацца газетнымі трубачкамі. Пакуль не вельмі атрымліваецца. Але хачу сплесці велікодны кошык.
Дыялогавыя пляцоўкі, сустрэчы з цікавымі людзьмі, заняткі па прафілактыцы дэменцыі ў альц-кафэ «Васількі», якое адкрылі на базе аддзялення ў канцы мінулага года, – усё гэта цікава Ірыне Аляксандраўне.
Яркія ўспаміны пакідаюць вандроўкі. У свой час аматар падарожжаў пабывала ў Крыме, Абхазіі, на Урале, у Грузіі, Літве, ва Украіне… Разам з тым адметныя мясціны ёсць зусім побач.
– Уразілі касцёлы і цэрквы ў Шаркаўшчынскім раёне. Цікава на «Дзісненскім рубяжы». Пазнаёмілася з Дзісной, дзе раней не ведала ніводнай вуліцы. Шмат новага даведалася пра міёрскі касцёл, – расказвае яна. – Запомнілася свята Арэхавы Спас, на якое запрасілі да сябе ў Чэрасы нашы сяброўкі з клуба «Суседачкі». Разам удзельнічалі ў абрадах і гульнях. Было цікава і весела.
Наноў адкрыўшы для сябе аддзяленне для грамадзян пажылога ўзросту, Ірына Грыцаенка дадала яркіх уражанняў і новых фарбаў у свае пенсіённыя будні. Цяпер візіты сюды ў пастаянных планах.
Кацярына Рынкевіч.
Фотаматэрыял Казіміра Блажэвіча.
