Читаем подшивку районной газеты за 2020 год.

(Працяг. Пачатак у №№ 3, 5, 7, 9, 11, 14, 17, 19, 23 за 14, 21, 28 студзеня, 4, 11, 22 лютага і 4, 11, 25 сакавіка).

Чытаем падшыўку раённай газеты за 2020 год.

Студзень

Напярэдадні Новага года скончыліся ўнутраныя рамонтныя работы ў цэнтральнай раённай аптэцы № 111.

***

У адміністрацыйным будынку СУП «Чэрасы» працуюць полацкія будаўнікі-аддзелачнікі. Адно з самых вялікіх памяшканняў на першым паверсе пераабсталёўваецца пад гандлёвую ўстанову. Стварэнне новага філіяла «Гурман» на завяршальнай стадыі.

***

Дзісненскі лясгас цяпер абсталяваны сістэмай аўтаматычнага выяўлення лясных пажараў. Са снежня на назіральнай вышцы ў Осцевічах сочыць за акругай у радыўсе 40 кіламетраў аўтаномная камера.

Люты

21 студзеня прыступіў да работы вышынны кран па вуліцы Лермантава ў райцэнтры. Там узводзіцца 40-кватэрны дом для работнікаў металапракатнага завода.

***

З верасня ў Камянполлі дзейнічае аграэкасядзіба «Проста Кася». Яе гаспадыня Касінія Казачонак суправаджае гасцей па патаемных сцежках заказнікаў «Ельня» і «Балота Мох».

***

На вытворчасці ААТ «Капіталдрэўпрадукт» нядаўна пачалі выпускаць акораныя калы. Яны карыстаюцца попытам у Латвіі і Вялікабрытаніі, куды накіравалі на экспарт прыкладна 100 кубаметраў.

***

Ва Узмёнах плануюць стварыць вёску будучыні. Жыццё тут ні ў чым не павінна саступаць гарадскому. Летась правялі газіфікацыю, падключыліся тры домаўладанні. Хутка далучыцца яшчэ 41.

Сакавік

Будаўнічая гатоўнасць металапракатнага завода па вытворчасці металічнага ліста і белай бляхі ў Міёрскім раёне складае 93 %.

***

На перакрыжаванні вуліц Верхнядзвінскай і Ягора Томкі ў райцэнтры бясснежная зіма дазволіла вызначыць граніцы будаўнічай пляцоўкі высокай агароджай. Тут размесціцца магазін «Санта».

***

У рамках праекта міжнароднай тэхнічнай дапамогі «Разам для грамады і прыроды: умацаванне працэсу развіцця ў Міёрскім раёне праз партнёрства мясцовай улады і грамадзянскай супольнасці», фінансуемага Еўрапейскім Саюзам, для райбальніцы набыты новы аўтамабіль хуткай медыцынскай дапамогі.

Май

Міёрскаму лясніцтву 4 мая споўнілася 50 гадоў. Яно ўтворана на базе Франопальскага і Новапагосцкага лясніцтваў і зноў прынятых калгасных лясоў.

***

Месца адпачынку «Гарадскі парк «Паўвостраў» сустрэне фестываль «Жураўлі і журавіны Міёрскага краю» ў абноўленым абліччы. Тут ужо да ліпеня з’явяцца сучасны дзіцячы гульнёвы комплекс, дзевяць лавачак са сметніцамі, прасторная альтанка. Да гэтага часу плануецца завяршыць рамонт аўтапаркоўкі з абуладкаваннем пляцоўкі з кантэйнерамі для паасобнага збору смецця і пешаходнай дарожкі, што вядзе ад уваходу ў парк да ратонды. На гэтым участку па левым баку пачнуць асвятляць шлях таршэрныя свяцільні са святлодыёднымі лямпамі.

***

На тэрыторыі Чапукоўскай школы з’явілася клумба з аптэчнымі раслінамі. Гэта эксперымент у рамках праекта «Школьны сад для развіцця сельскагаспадарчага прадпрымальніцтва», у якім установа адукацыі ўдзельнічае з 2018 года. Вырашчаныя расліны ў школе выкарыстаюць для сашэ і гарбаты.

Чэрвень

У Віцебску адбыўся абласны этап конкурсу «Урач года». У ліку пераможцаў загадчык Новапагосцкай амбулаторыі, урач агульнай практыкі Міёрскай ЦРБ Таццяна Даргель. Яна прыме ўдзел у рэспубліканскім этапе конкурсу.

***

Міёрскі металапракатны завод уступіў у перадпускавы перыяд. У мінулую сераду сюды прыбылі першыя вагоны з гарачакатаным ліставым металам – сыравіной для пракатчыкаў. Ужо ў ліпені з канвеера сыдзе першая партыя гатовай прадукцыі.

Ліпень

На Міёрскім мясакамбінаце адбываюцца станоўчыя змяненні. З уключэннем у склад холдынга на базе Полацкага малочнага камбіната стабілізаваўся калектыў, згуртаваўся на плённую працу. Асабліва важна, што з красавіка прадпрыемства працуе з прыбыткам. Камбінат мае пастаянных спажыўцоў не толькі ў Беларусі – вярнуўся на расійскі рынак.

Жнівень

Кіраўніцтва ВУП «Міёрскі мясакамбінат» узяло курс на аднаўленне фірменнага гандлю, якім калісьці актыўна займалася. Першынцам выбралі цяпер дзеючы магазін «Гурман». Да практычнай рэалізацыі выбранага накірунку прыступілі з абнаўлення ўласнымі сіламі часткі былога комплексна-прыёмнага пункта камбіната бытавога абслугоўвання ў аграгарадку Туркова. Чацвёртага жніўня адбылося ўрачыстае адкрыццё магазіна «Пачастунак».

***

Па ініцыятыве кіраўніка ВУПКУ «Міёрскі» Васіля Міхалківа новае аблічча крыху раней набылі могілкі ў Мілашове, Прудніках, Бабарыках і нядаўна – у Дзедзіне.

Верасень

McLaren Racing і Міёрскі металапракатны завод аб’явілі пра старт доўгатэрміновага партнёрства ў рамках сезонаў «Формулы 1». Пачынаючы з Гран-пры «Формулы 1» у Бельгіі лагатып Miory Steel з’явіцца на носе балідаў рукавах экіпажу McLaren.

***

У жніўні завяршыўся абласны турнір па боксе, прысвечаны Дню незалежнасці. Ва-дзім Вячэрскі ўзяў золата, а Юрый Пахірка – серабро. Яны і былі ўдастоены права прадставіць Віцебшчыну ў Гродна на рэспубліканскім першынстве.

***

Пасля капітальнага рамонту адчыніў свае дзверы другі этаж фізкультурна-аздараўленчага комплексу.

***

З ажыятажам 18 верасня адчыніўся супермаркет «Санта».

Кастрычнік

У сувязі з планавай мадэрнізацыяй тэлефоннай сеткі ў Міёрах на некаторых вуліцах будуць весціся земляныя работы, а ў наступным – пракладка оптавалаконнага кабеля.

***

Брыгада Міёрскага раёна газазабеспячэння другі год запар лідзіруе ў рэспубліканскім аглядзе-конкурсе прафмайстэрства.

***

Напярэдадні прафесійнага свята ў Віцебскім абласным упраўленні Дэпартамента аховы ўзнагародзілі пераможцаў агляду-конкурсу «Найлепшы работнік падраздзялення вартавой аховы – 2020». Першае месца ў вартаўніка трэцяга разраду Міёрскага аддзялення аховы Ады Мароз.

***

Сёлета Павяцкая яслі-сад – сярэдняя школа пацвердзіла статус «Зялёная школа».

Лістапад

Мясцовыя аператары металапракатнага завода пад пільным наглядам нямецкіх настаўнікаў першымі яшчэ ў канцы жніўня пачалі асвойваць рэверсны стан RCM.

***

На Міёрскім металапракатным заводзе 7 лістапада запусцілі чарговую адзінку тэхналагічнага абсталявання – пракатна-дрэсіровачны стан. Да канца года ўвойдзе ў строй лінія луджэння. Тады з канвеера нарэшце сыдзе першы найтанчэйшы ліст белай бляхі. Гэта будзе пяты – фінальны – этап поўнага пуску прадпрыемства.

***

Неўзабаве спецыялісты металапракатнага завода атрымаюць для засялення два новыя двухпавярховыя васьмікватэрныя дамы па вуліцы Партызанскай.

Снежань

Наваселле справіла аддзяленне дзённага знаходжання для інвалідаў ТЦСАН у былым дзіцячым аддзяленні райбальніцы.

***

Дзісненскі лясгас узяў курс на тэхнічнае пераўзбраенне. Нядаўна аўтатрактарны парк гаспадаркі папоўніўся новым сартыментавозам МАЗ, харвестарам і фарвардарам «Амкадор», «Нівай». На падыходзе «УАЗ», трал, які будзе выкарыстоўвацца для перавозкі шматаперацыйнай тэхнікі, і дзве лесавозныя цялежкі з маніпулятарамі.

***

У тэрытарыяльным цэнтры ў Міёрах рыхтуюцца да адкрыцця сацыяльнага кафэ «Сярэбраны ўзрост», дзе пажылых і людзей з абмежаванымі магчымасцямі навучаць камп’ютарнай граматнасці.

***

20 снежня ў сталіцы адбылося ўрачыстае мерапрыемства па перадачы 354 трактараў «Беларус» Мінскага трактарнага завода аграпрамысловым прадпрыемствам Віцебскай вобласці. Аднавіліся медхвары і на Міёршчыне.

***

Пернікі «Шакаладнікі» Міёрскай вытворчасці Полацкага хлебазавода сёлета атрымалі медаль на рэспубліканскім аглядзе-конкурсе якасці хлебабулачных і кандытарскіх вырабаў «Смаката-2020».

***

17 снежня першая паласа тонкага металу паспяхова пераадолела агрэгат электралітычнага луджэння – амаль апошняе важнае звяно ўсёй вытворчай лініі выпуску белай харчовай бляхі.

Падшыўку гартала Алена ВАРОНІНА.
Фотаматэрыял з архіва рэдакцыі.