Директором филиала «Миорский комбикормовый завод» ОАО «Полоцкий КХП» с 15 января назначен Юрий Гайлевич.

Дырэктарам філіяла «Міёрскі камбікормавы завод» ААТ «Полацкі КХП» з 15 студзеня прызначаны Юрый Гайлевіч.

Нарадзіўся Юрый Віктаравіч 18 ліпеня 1979 года ў Міёрах. Скончыўшы СШ № 2, паступіў у Маладзечанскі вучэбна-вытворчы комплекс «ПТВ-тэхнікум» на спецыяльнасць «Бухгалтарскі ўлік, аналіз і аўдыт». Вышэйшую адукацыю атрымаў у Беларускім гандлёва-эканамічным універсітэце спажыўкааперацыі.

Са сферай спажыўкааперацыі звязана значная частка працоўнай біяграфіі. Кантрольна-рэвізійным работнікам пачынаў у Міёрскім райспажыўтаварыстве. Такую ж пасаду займаў у Браслаўскім райспажыўтаварыстве, якое пасля ўзначаліў. Таксама быў начальнікам Міёрскага ўчастка Верхнядзвінскага райспажыўтаварыства.

У філіяле «Міёрскі камбікормавы завод» заняты з 25 верасня 2023 года. Пачынаў намеснікам дырэктара па камерцыйных пытаннях з ускладаннем абавязкаў кіраўніка.

У ліку задач, што стаяць перад дырэктарам філіяла і калектывам сярэдняй колькасцю ў 65 чалавек, – павялічваць аб’ёмы вытворчасці і зніжаць затраты, выходзіць на станоўчы фінансавы вынік, асвойваць новыя рынкі збыту гатовай прадукцыі. Цяпер у ліку пастаянных спажыўцоў камбікармоў сельгаспрадпрыемствы Міёрскага, Браслаўскага, Шаркаўшчынскага і Верхнядзвінскага раёнаў.

У філіяле «Міёрскі ККЗ» вырабляюць камбікорм трох відаў, ячныя і пярловыя крупы. Апошнія плануюць рэалізоўваць як оптам, так і ў розніцу праз гандлёвую сетку з фасоўкай па кілаграме. Таксама ў планах наладзіць выпуск новых відаў камбікармоў. Застаюцца актуальнымі паслугі па захаванні і складаванні зерня, яго сушка і ачыстка, аўтатранспартныя паслугі, вырошчванне і адкорм буйной рагатай жывёлы.