У маці, ад якой два гады таму забіралі траіх сыноў, зноў праблемы. Тата шасцярых дзяцей не спяшаецца змяняць свой лад жыцця, за што можа трапіць у лячэбна-працоўны прафілакторый. За тры месяцы бацькі выключылі крытэрыі сацыяльнай нядобранадзейнасці – сям’ю знялі з уліку. Гэтыя і іншыя сітуацыі разгледзелі на пасяджэнні камісіі па справах непаўналетніх райвыканкама.

«Сарвалася, прызнаю сваю памылку»

– Можа, Вам дзеці не патрэбны? – пытаюцца ў шматдзетнай маці.

У Марыны (гэтае і наступныя імёны зменены) трое сыноў. Іх бацька з сям’ёй не жыве, матэрыяльна дапамагае. Два гады таму дзеці былі прызнаны маючымі патрэбу ў дзяржаўнай абароне і знаходзіліся ў прытулку. Маці прыклала намаганні, каб іх вярнуць. Сітуацыя зноў абвастрылася. Па інфармацыі з установы адукацыі, дзеці прыходзяць на заняткі паўгалодныя, знешні выгляд неахайны. Дамашнія заданні не рыхтуюць, малодшы не рэагуе на заўвагі педагогаў. У доме беспарадак і антысанітарыя. Маці заўважалі ў нецвярозым стане.

– Сарвалася, прызнаю сваю памылку, – гаворыць Марына і абяцае ўсё выправіць.

Сям’ю паставілі на ўлік. Што трэба рабіць, маці ведае. Перш-наперш прывесці ў парадак жыллё, прайсці лячэнне ад алкагольнай залежнасці.

Пытанні застаюцца

У доме ліквідавана антысанітарыя, пагашана запазычанасць за камунальныя паслугі, маецца запас паліва, абстаноўка спакойная. Аднак пытанні да сям’і, дзе нядаўна нарадзілася шостае дзіця, застаюцца. Патрэба ў знешнім кантролі па-ранейшаму актуальная. Так, падчас аднаго з наведванняў гаспадара засталі ў стане алкагольнага ап’янення. Работа з сям’ёй прадоўжыцца. Абавязковая ўмова для бацькі – кадзіроўка. Папярэдзілі: не зменіць лад жыцця – паедзе ў лячэбна-працоўны прафілакторый.

Сітуацыя пагоршылася

Дзве сям’і ў адным доме. З Тамарай жыве яе дарослая дачка Яна з паўгадовым немаўляці. Алкаголь жанчыны не ўжываюць. Хапае іншых прычын, з-за чаго дачка-школьніца Тамары і дзіця Яны прызнаны маючымі патрэбу ў дзяржаўнай абароне. Не цалкам адрамантавана пячное ацяпленне, дэманціраваны аўтаномны пажарны апавяшчальнік, непасечаныя дровы пад гурбамі снегу, у доме адзіночныя аконныя рамы, шкло месцамі заклеена скотчам, у пакоях бруд і холад. Такую карціну назіралі падчас чарговага візіту ў сям’ю, крытэрыі сацыяльнай нядобранадзейнасці ў якой выявілі чатыры месяцы таму. Сітуацыя пагоршылася.

Станоўчы вынік

Работу з сям’ёй, дзе выхоўваецца чатырохгадовае дзіця, вялі на працягу трох месяцаў. Кантроль дома – раз на тыдзень. За гэты час бацькоў у стане алкагольнага ап’янення не заўважалі. Абодва займаліся дзіцём і забяспечвалі яго ўсім неабходным. Не ўзнікала пытанняў наконт санітарна-гігіенічнага стану жылля, прадуктаў харчавання дастаткова. Станоўчы вынік відавочны. Прынята рашэнне зняць сям’ю з уліку.

Дзеці вернуцца дадому

Траіх дзяцей Сцяпана і Эмы прызналі маючымі патрэбу ў дзяржаўнай абароне ў верасні. Іх забралі да сябе сваякі Эмы з іншага раёна. Яна адразу ж пераехала за імі, дзяцей наведвае штодня. Уладкавалася на працу ў сельгаспрадпрыемства, адтуль станоўчыя характарыстыкі. Сцяпан застаўся, сувязь з дзецьмі трымае па тэлефоне. Эма гатова даць мужу другі шанц, але вяртацца на ранейшае месца жыхарства не намерана. Сцяпан жадае жыць з сям’ёй. Камісія лічыць магчымым вярнуць дзяцей бацькам.

Шанцы невялікія

Толькі праз тры месяцы, як дзеці былі адабраны з сям’і, Павел і Надзея прайшлі лячэнне ад алкагольнай залежнасці. Да гэтага не спяшаліся змяняць свой лад жыцця. Аднак зрабілі касметычны рамонт дома, раз на месяц наведвалі дзяцей у прытулку. Абодва дапускаюць прагулы на працы. Падчас наведвання дома Надзея агрэсіўна рэагавала на заўвагі. Па меркаванні камісіі, шанцы вярнуць дзяцей малыя.

– Я пастараюся ўсё выправіць. Дакажу, што ўсё будзе нармальна, – запэўнівае маці.

Наступная сустрэча праз месяц. 

Кацярына РЫНКЕВІЧ.