Музыка і апладысменты гучалі выхадным днём у аграгарадку Чапукі. Свята для аднавяскоўцаў ла-дзілі загачык мясцовага СДК Вераніка Хаданёнак і бібліятэкар Наталля Тумарава. Творчыя нумары дарылі чапукоўскія артысты і салісты народнай эстраднай студыі Міёрскага ЦКіНТ. Упрыгожыла мерапрыемства выстава дэкаратыўных вырабаў, створаных мясцовымі ўмельцамі.

   Свята вёскі – прыемная нагода сабрацца разам, адпачыць, слухаючы добрыя песні, зарадзіцца пазітывам. А яшчэ – атрымаць віншаванні і падарункі.  
   Вітала жыхароў і гасцей аграгарадка старшыня Новапагосцкага сельвыканкама Раіса Гернат. Завітала на свята з падарункамі для гаспадароў, якія ствараюць на сваіх падворках утульнасць і прыгажосць. У іх ліку Садонія Шыдлоўская, Алег і Ала Байчукі, Людміла Ракшня, Юрый і Тэрэза Корсакі, Эдуард і Зоя Кажаны. 
   Дарэчы, Садоніі Фанімічне Шыдлоўскай у чэрвені споўнілася 87 гадоў, нягледзячы на ўзрост, клапоціцца пра парадак і эстэтыку ў сваім двары. 
Старэйшых жыхароў месцейка на свяце адзначылі асобна. Сярод іх Нона Віктараўна Касцюкевіч, Алена Іванаўна Чарняўская, Ліна Паўлаўна Рубо, Лідзія Мікалаеўна Байчук, Ангеліна Лук’янаўна Драба. Жыве ў Чапуках малалетні вязень фашызму Людміла Іванаўна Бялевіч, ёй 81 год. 
   У спісе чапукоўскіх юбіляраў – 37 імёнаў. Для шматдзетнай сям’і Аляксандра і Кацярыны Васільевых 2025 год юбілейны двойчы. Сустрэлі крыштальнае вяселле – 15 гадоў разам. Пяць гадоў споўнілася малодшай дачушцы Дарыне.
   Таксама па трое дзетак выхоўваюцца ў сем’ях Аляксандра і Веранікі Хаданёнкаў, Мікалая і Святланы Сцяпанавых, Дзяніса і Алены Стральчукоў. Самы маленькі жыхар Чапукоў – Назар Цвіценка. 
   Шмат прагучала на свяце прыемных віншаванняў і добрых песень. Тым, хто не змог завітаць на мерапрыемства, культработнікі пасля даставілі падарункі на дом.