Былая загадчыца аднаго з магазінаў Міёрскага райспажыўтаварыства адбывае пакаранне ў папраўчай калоніі ва ўмовах агульнага рэжыму.

40-гадовая міярчанка Аліна (імя зменена) асуджана па частцы 3 артыкула 210 Крымінальнага кодэкса "Крадзеж шляхам злоўжывання службовымі паўнамоцтвамі".

Аліна працавала прадаўцом і выконвала абавязкі загадчыцы ў адным з магазінаў райцэнтра. Устаноўлена, што на працягу сямі месяцаў - з 25 ліпеня 2014 года па 2 сакавіка 2015-га - яна здавала выручку не ў поўным аб'ёме. Частку атрыманых ад рэалізацыі прадукцыі сродкаў выкарыстоўвала на асабістыя патрэбы. Агульная сума ўкрадзенага - 15 548 рублёў 65 капеек. Райспажыўтаварыству прычынены ўрон у буйным памеры.

У лютым 2015 года ў магазіне праводзілася інвентарызацыя таварна-матэрыяльных каштоўнасцей. Каб не паказваць недастачу, Аліна загадала аператару ЭВМ унесці несапраўдныя звесткі ў інвентарызацыйны вопіс. Што і было зроблена. У гэтай частцы дзеянні загадчыцы расцэнены як арганізацыя службовай падробкі. Гэта злачынства, пакаранне за якое вызначана ў ч. 1арт. 427 і ч. 4 арт. 16 Крымінальнага кодэкса.

Прыгавор суда вынесены сёлета напрыканцы лютага. Аліну асудзілі на тры гады і шэсць месяцаў пазбаўлення волі з канфіскацыяй маёмасці і пазбаўленнем права займаць матэрыяльна адказныя пасады на працягу пяці год.

Фота для ілюстрацыі.
Аляксандр МАРЦІНЧЫК,
намеснік пракурора.