Хлопчык не вярнуўся ў звычайны час са школы і бацькі ўстрывожыліся, патэлефанавалі настаўніку і даведаліся, што ў гэты дзень яго не было на занятках. "Мабільнік" ён забыўся  дома. Пагутарылі з усім знаёмымі і сябрамі, праверылі месцы, дзе мог быць хлопчык, але яго не знайшлі і звярнуліся за дапамогай у міліцыю. Быў арганізаваны пошук.

Парывісты вецер, снежная завея і кароткі снежаньскі дзень прымушалі супрацоўнікаў міліцыі працаваць аператыўна. І іх старанне не было дарэмным. Прачэсваючы мясцовасць па маршруце меркаванага руху дзіцяці ў школу, адзін з шукальнікаў пачуў плач, які даносіўся з-пад зямлі. Супрацоўнік міліцыі знайшоў ледзь прыкметны, зарослы пустазеллем, адкрыты каналізацыйны люк. У калодзежы, на глыбіні больш за 2 метры, знаходзіўся ў вадзе хлопчык. Зразумела, за дзесяць гадзін такога зняволення ён быў зусім знясілены. З дыягназам "агульнае пераахаладжэнне" малалетняга даставілі ў цэнтральную раённую бальніцу ў рэанімацыйнае аддзяленне…

Гэты выпадак адбыўся ў Лельчыцкім раёне. Але хіба мае значэнне месца здарэння, калі ідзе размова пра жыццё дзіцяці?! Вельмі часта малыя трапляюць у бяду з-за сваёй цікаўнасці ці неасцярожнасці. І пра гэта найперш павінны памятаць дарослыя, якія іншы раз сваёй безгаспадарчасцю ствараюць "пасткі". Наперадзе зіма. І цяпер пагрозу для дзяцей і дарослых будуць уяўляць не толькі адчыненыя каналізацыйныя люкі і выграбныя ямы, разбураныя (без зрубаў) піццявыя калодзежы ля старых, пустуючых дамоў ці на былых вясковых сядзібах, але і шматлікія штучна створаныя палонкі на рэках і азёрах. Грамадзяне, чые дамы месцяцца паблізу вадаёмаў, звычайна высякаюць лёд, каб мець магчымасць браць ваду ці купацца. І рэдка хто абгароджвае такія небяспечныя месцы штыкетнікам, жэрдкамі, дошкамі ці металічнымі канструкцыямі. А адкрытая вада, зацярушаная снегам ці пакрытая тоненькім ільдом, у імгненне можа "забраць" жыццё. Таму яшчэ раз нагадаю гараджанам і вяскоўцам пра неабходнасць агараджэння палонак на вадаёмах. Такія ахоўныя канструкцыі павінны стаяць і ў месцах прамысловых скідаў вады ў вадаёмы.

С. ГРЫГОР'ЕЎ, старшыня РГА "АСВОД".