У дзень 20 красавіка ў аператыўна-дзяжурную службу Міёрскага РАУС паступіла паведамленне ад супрацоўніка Браслаўскай міжраённай інспекцыі аховы жывёльнага і расліннага свету. На тэрыторыі Туркоўскага сельсавета затрыманы двое мужчын, якія незаконна здабывалі рыбу. На месца выехала следча-аператыўная група.

Як расказала следчы раённага аддзела Следчага камітэта Марына Гелеш, парушальнікамі аказаліся жыхар Наваполацка 1991 года нараджэння і яго старэйшы сябар 1976 г.н., які пражывае ў Туркоўскім сельсавеце. Абодва не працуюць. Рыбу здабывалі ў месцы, дзе невялікая рака Вянужка ўпадае ў Заходнюю Дзвіну. У арсенале браканьераў—11 рыбалоўных сетак. Іх паставілі звечара, а на наступны дзень адправіліся "збіраць ураджай".

Цану за яго давядзецца заплаціць вялікую. Да прыкладу, адна асобіна незаконна здабытага шчупака, незалежна ад вагі, ацэньваецца ў 3 базавыя велічыні. Агульная сума ўрону—15 330 000 рублёў. Пагаршае становішча рыбакоў той факт, што з 10 красавіка да 8 чэрвеня забаронены вылаў усіх відаў рыбы ў рыбалоўных угоддзях вобласці. Рыбачыць дазваляецца толькі з берага на вуду з адным кручком. Згодна з Указам Прэзідэнта ад 8 снежня 2005 г. №580, шкода, нанесеная незаконнай здабычай рыбы ў перыяд дзеяння забароны на яе вылаў, вылічваецца ў трайным памеры па кожным відзе рыбы. Простая арыфметыка: 15 330 000х3=45 990 000.

—Раённым аддзелам Следчага камітэта праведзена праверка і ў выніку ўзбуджана крымінальная справа па частцы 2 артыкула 281 Крымінальнага кодэкса "Незаконная здабыча рыбы ці іншых водных жывёл",—адзначае следчы Марына Гелеш.—Справа перададзена ў суд. Згодна з вышэйуказаным артыкулам, незаконная рыбалка караецца штрафам, або арыштам на тэрмін да шасці месяцаў, або абмежаваннем волі да двух год ці яе пазбаўленнем да трох год.