Для Дзяржінспекцыі аховы жывёльнага і расліннага свету 2026 год пачаўся з чарговых затрыманняў. Падчас палявога мерапрыемства браслаўскія супрацоўнікі знайшлі ў пятлі з металічнага тросу жывога трафейнага самца высакароднага аленя. Жывёлу вызвалілі і вярнулі ў натуральны асяродак пражывання. Аглядаючы тэрыторыю, знайшлі яшчэ адну пятлю і ўдаўку з капронавай ніткі. Выяўлена, што іх паставіў недалёка ад сваёй дачы мясцовы жыхар.

Следча-аператыўная група Глыбоцкага РАУС падчас агляду жылля адабрала зарэгістраванае ружжо, патроны з дробам, самагонны апарат, 10 літраў самагону і пакет з рыбалоўнымі прыладамі.

Праводзіцца праверка ў адносінах да падазраваемага, вырашаецца пытанне аб узбуджэнні крымінальнай справы па ч. 4 арт. 282 КК, а таксама аб прыцягненні да адміністрацыйнай адказнасці па арт. 16.27 і 16.26 КаАП.

Незаконнае – без дазволу, або ў забароненых месцах, у забаронены час ці забароненымі прыладамі ці спосабамі, або ў забароненыя тэрміны – паляванне цягне адміністрацыйную адказнасць. Гэта штраф да 30 базавых велічынь з канфіскацыяй прылад палявання ці без яе і з пазбаўленнем спецыяльнага права. Крымінальная адказнасць – штраф, пазбаўленне волі на тэрмін да шасці гадоў з пазбаўленнем права займаць пэўныя пасады або займаццца пэўнай дзейнасцю, а таксама грамадзянска-прававая – кампенсацыя шкоды, прычыненай навакольнаму асяроддзю.

Уладзімір ЯГОРАНКАЎ,
старшы інспектар Браслаўскай міжраённай інспекцыі аховы
жывёльнага і расліннага свету пры Прэзідэнце Рэспублікі Беларусь.