Абараняць дзяцей ад шкоднай інфармацыі ў Інтэрнэце ўжо не проста рэкамендацыя, а заканадаўча замацаваны абавязак для бацькоў. Адпаведныя змяненні ўнесены ў Закон «Аб правах дзіцяці» і набылі моц.

– У абноўленым заканадаўстве асаблівая ўвага надаецца абароне дзяцей ад інфармацыі, якая можа нанесці шкоду іх здароўю, маральнаму і псіхалагічнаму развіццю, – адзначае намеснік пракурора раёна Святлана Раманоўская. – Пералік такой інфармацыі даволі шырокі.

Згодна з артыкулам 37-1 Закона «Аб правах дзіцяці», да шкоднай адносіцца інфармацыя, якая:

v выклікае жаданне ўжываць алкагольныя, слабаалкагольныя напоі, піва, наркатычныя сродкі, псіхатропныя рэчывы, іх аналагі, таксічныя або іншыя адурманьвальныя рэчывы, тытунёвыя вырабы;

v заахвочвае да ўчынення злачынства або іншага грамадска небяспечнага дзеяння, у тым ліку да заняткаў прастытуцыяй, папрашайніцтва, бадзяжніцтва, удзелу ў рызыкоўных гульнях; учынення дзеянняў, звязаных з вырабам, распаўсюджваннем парнаграфічных матэрыялаў або прадметаў парнаграфічнага характару;

v станоўча ацэньвае злачынства або ідэалізуе злачынцаў; заахвочвае паводзіны, якія ўшчамляюць чалавечую годнасць, у тым ліку ўчыненне гвалтоўных дзеянняў у адносінах да людзей або жывёл;

v адлюстроўвае здзекі над чалавекам або групай людзей ці іх прыніжэнне ў сувязі з этнічным паходжаннем, нацыянальнай, расавай, рэлігійнай, моўнай, палавой прыналежнасцю, перакананнямі або поглядамі, сацыяльным становішчам, захворваннем;

v заахвочвае або станоўча ацэньвае жорсткасць, фізічны, псіхалагічны, сексуальныя гвалт, сексуальную эксплуатацыю, сексуальныя адносіны з удзелам дзяцей;

v заахвочвае да нанясення цялесных пашкоджанняў або самагубства, апісвае сродкі або абставіны самагубства;

v утрымлівае методыкі або іншыя матэрыялы пра спосабы вырабу небяспечных для жыцця і здароўя людзей прадметаў і іх выкарыстанне;

v заахвочвае звычкі, якія супярэчаць фарміраванню здаровага ладу жыцця;

v утрымлівае нецэнзурныя словы і выразы;

v дыскрэдытуе інстытут сям’і і шлюбна-сямейныя адносіны;

v запалохвальнага характару, у тым ліку прадастаўляемая ў выглядзе выявы або апісання ў прыніжальнай чалавечую годнасць форме смерці, няшчаснага выпадку, аварыі, катастрофы, захворвання і (або) іх наступстваў;

v утрымлівае парнаграфічныя матэрыялы і (або) эротыку.

Заканадаўча замацаваны абавязак бацькоў (апекуноў, папячыцеляў) абараняць дзяцей ад інфармацыі ў Інтэрнэце, якая наносіць шкоду іх здароўю і развіццю.

– Бацькі павінны вучыць дзяцей арыентавацца ў інфармацыйным полі і адрозніваць карысны і пазнавальны кантэнт ад небяспечнага, – заўважае намеснік пракурора. – Эфектыўнай мерай будзе заключэнне з пастаўшчыкамі інтэрнэт-паслуг дагавору на аказанне паслуг па абмежаванні доступу да пэўных рэсурсаў.

Дзяржорганы, дзяржаўныя і іншыя арганізацыі павінны аказваць інфармацыйна-кансультацыйную дапамогу бацькам у рэалізацыі мер па абароне дзяцей ад шкоднай інфармацыі ў Інтэрнэце.