Грыбны сезон традыцыйна суправаджаецца ростам колькасці атручванняў сярод насельніцтва. Нагадаем правілы бяспекі, якія дапамогуць захаваць жыццё і здароўе.

 У нашай краіне сустракаецца некалькі дзясяткаў ядавітых грыбоў, многія з іх знешне амаль неадрозныя ад ядомых. Таксіны, якія ўтрымліваюцца ў іх, паражаюць розныя органы і сістэмы. У першую чаргу пакутуе страўнікава-кішэчны тракт, што праяўляецца ванітаваннем, ірвотай, дыярэяй і болямі ў жываце. Нервовая сістэма рэагуе галюцынацыямі, парушэннямі каардынацыі і спутанасцю свядомасці. У найбольш цяжкіх выпадках паражаюцца печань і ныркі, што можа прывесці да вострай недастатковасці і смерці.

Асаблівая небяспека ў так званым схаваным перыядзе, калі пасля першапачатковага паляпшэння самаадчування наступае рэзкае пагаршэнне, звязанае з незваротным паражэннем унутраных органаў. Антыдоту супраць большасці грыбных таксінаў не існуе, таму час грае вырашальную ролю.

Як вызначыць ядавітыя грыбы? Яны неабавязкова маюць яркую афарбоўку, могуць не цямнець пры варцы з цыбуляй ці серабром, іх не заўсёды абыходзяць бокам чэрві і насякомыя. З’яўленне малочнага соку ці змяненне колеру на зрэзе характэрна і многім ядомым грыбам. Адзіны надзейны спосаб пазбегнуць атручвання – не збіраць і не ўжываць тыя, у якіх вы не ўпэўнены цалкам.

Не збірайце грыбы, калі вы не вопытны грыбнік і не давярайце знешняму падабенству з малюнкам у інтэрнэце. Не купляйце дзікарослыя віды з рук на стыхійных рынках і ўздоўж дарог, а ў магазінах патрабуйце дакументы, якія пацвярджаюць іх бяспеку. Не карміце імі дзяцей, пажылых людзей і цяжарных жанчын. Усмоктванне таксінаў узмацняе алкаголь, таму непажадана ўжываць спіртныя напоі разам з грыбамі.

Калі пасля ўжывання грыбоў з’явіліся трывожныя сімптомы, тэрмінова выклікайце хуткую медыцынскую дапамогу па нумары 103 ці дастаўце пацярпелага ў бальніцу. Да прыезду ўрачоў неабходна прамыць страўнік. Для гэтага даць выпіць тры – пяць шклянак цёплай вады ці слабага раствору марганцоўкі і выклікаць ірвоту, націснуўшы на корань языка. Абавязкова рабіць гэта на баку. Нельга піць малако, прымаць алкаголь, паслабляльныя сродкі, есці тлустую ежу і займацца самалячэннем.

Важна захаваць рэшткі прадукта – ачысткі, суп ці ірвотныя масы, – каб урачы хутчэй вызначылі тып таксіну і прызначылі правільнае лячэнне. Калі грыбы елі некалькі чалавек, праверыцца павінны ўсе, нават пры адсутнасці сімптомаў, бо яны могуць праявіцца праз 6-24 гадзіны, калі рахунак ужо ідзе на хвіліны.

Ірына ГІЛЬНІЧ, спецыяліст санітарна-гігіенічнага аддзела РЦГЭ.
Фота для ілюстрацыі.