У сувязі з міграцыяй дзікіх пералётных птушак узнікае пагроза захворваемасці тых, хто гадуецца на прыватных падворках, на хваробу Ньюкасла. Так званая псеўдачума – вірусная хвароба, працякае востра і распаўсюджваецца хутка, паражае органы дыхання, страўнікава-кішэчнага тракта і цэнтральнай нервовай сістэмы.

Пры вострым цячэнні хваробы гіне каля 60-90% птушкі. Пры ўзнікненні эпізаатыі вялікія выдаткі ідуць на карантынныя і прафілактычныя мерапрыемствы. Да хваробы ўспрымальныя ўсе хатнія і дзікія птушкі атраду курыных, найбольш церпяць маладыя. Качкі і гусі ўстойлівыя, але могуць быць носьбітамі віруса. Крыніца інфекцыі – хворая птушка, якая знаходзіцца ў інкубацыйным перыядзе, а таксама грызуны і дзікія птушкі. Перадавацца вірус можа і праз неабеззаражаныя прадукты і сыравіну: яйкі, мяса, подсціл, корм, пяро і пух, а таксама кляшчоў і забруджаны выдзяленнямі хворых інвентар.

Інкубацыйны перыяд доўжыцца тры – сем дзён, зрэдку дзевяць – дванаццаць. Пры маланкавым цячэнні птушка гіне раптоўна без выражаных клінічных прыкмет. Пры вострым – рэзка пагаршаецца апетыт, а потым знікае. Тэмпература цела павышаецца да 44 градусаў, з’яўляюцца вяласць, прыгнечанасць, маларухомасць, паражэнні нервовай і дыхальнай сістэм, развіваюцца кан’юнктывіты, рагавіца мутнее. У ротавай і носавай поласцях назапашваецца шмат слізі. Птушка кашляе, чхае, выдае «каркаючыя» гукі і дыхае адкрытай дзюбай. Часта ўзнікае панос, экскрэменты афарбаваныя ў зялёны колер, зрэдка бывае прымесь крыві. Пры паражэнні цэнтральнай нервовай сістэмы хада становіцца хісткай, птушкі здзяйсняюць кругавыя рухі, дадаюцца паралічы шыі, крылаў, ног. Смерць наступае праз тры – дванаццаць дзён пры моцным знясіленні.

Лячэння хваробы няма, адзіны спосаб пазбегнуць яе – вакцынацыя. Ажыццяўляецца яна шляхам выпойвання разведзенай у вадзе вакцыны. Папярэдне птушку трэба на працягу дзвюх – трох гадзін трымаць без вады.

Раздаваць бясплатную вакцыну жыхарам Міёршчыны плануецца з 1 па 9 чэрвеня па сельсаветах: Мікалаёўскі – 1 чэрвеня, Узмёнскі – 2-га, Завуццеўскі і Язненскі – 3-га, Туркоўскі – 4-га, Новапагосцкі – 5-га, Павяцкі – 8-га, Перабродскі – 9-га. Міярчане і тыя, хто пражывае на тэрыторыі Міёрскага сельсавета, могуць звяртацца ў райветстанцыю.

Вакцына расфасавана ў флакон на 100 доз, перад прымяненнем яго змесціва неабходна растварыць у літры чыстай пітной вады, разліць у вымытыя без прымянення дэзсродкаў паілкі з разліку 10 мл на адну птушку. Разведзеную вакцыну варта выкарыстаць на працягу гадзіны.

Васіль ЛАПІЦКІ,
начальнік супрацьэпізаатычнага аддзела ветстанцыі.